Bakı, 4 iyul, AZƏRTAC

Azərbaycan növbəti dəfə çox böyük və mötəbər beynəlxalq tədbirə - Qoşulmama Hərəkatının Parlament Şəbəkəsinin Bakı Konfransına ev sahibliyi etdi. Qoşulmama Hərəkatının institusional inkişafı üçün irəli sürülmüş bir sıra təkliflərdən biri də artıq reallaşdı. Digər vacib təşəbbüslər isə Gənclər Şəbəkəsi və Nyu-Yorkda Qoşulmama Hərəkatının Dəstək Ofisinin yaradılmasıdır.

Azərbaycan Birləşmiş Millətlər Təşkilatından sonra ikinci ən böyük beynəlxalq təsisat olan Qoşulmama Hərəkatına sədrlik etməyə başladıqdan sonra hərəkatın həyatında çox mühüm irəliləyişlər əldə edilib. Azərbaycanın Qoşulmama Hərəkatına sədr seçilməsi üzvlərin yekdil həmrəyliyi ilə reallaşıb. Daha sonra 120 ölkənin yekdil qərarı ilə Azərbaycanın Qoşulmama Hərəkatına sədrliyinin müddəti 2023-cü ilin axırına kimi uzadılıb. Bu, Azərbaycana böyük bir hörmət və ölkəmizin fəaliyyətinin qiymətləndirilməsinin əlamətidir.

Qoşulmama Hərəkatı Parlament Şəbəkəsinin Bakı Konfransında çıxış edən Azərbaycan Prezidenti İlham Əliyev ölkəmizin Qoşulmama Hərəkatındakı sədrlik fəaliyyətindən və irəli sürülən təşəbbüslərdən bəhs edərək Parlament Şəbəkəsinin yaradılmasını mühüm addım kimi qiymətləndirdi. Parlament şəbəkəsi təkcə üzv ölkələr arasında həmrəyliyə töhfə verməyəcək, eyni zamanda, dünyanın müxtəlif parlament təşkilatları ilə sıx iş münasibətləri quracaq. Parlament diplomatiyası və parlamentlərarası münasibətlərin inkişafı bütün ölkələr üçün mühüm əhəmiyyət kəsb edir. Prezident İlham Əliyev çıxışı zamanı qeyd etdi ki, ölkəmizin Qoşulmama Hərəkatında sədrliyi COVID-19 ilə üst-üstə düşdü və Azərbaycan beynəlxalq arenada bu xəstəliklə mübarizədə öz rolunu fəal oynayan ölkələrdən biri oldu. Azərbaycanın təşəbbüsü ilə 2020-ci ilin may ayında Qoşulmama Hərəkatının onlayn Zirvə toplantısının keçirilməsi pandemiya ilə mübarizədə dövlətlərin səfərbər edilməsi üçün ilkin addımlardan biri idi. Azərbaycanın səyləri təkcə həmrəyliyin gücləndirilməsi və dəstəyin təmin edilməsinə yönəlməyib. Ölkəmizin təşəbbüsü ilə hazırlanmış ölkələrə dəstək, tibbi və humanitar yardımla bağlı məlumat bazası Ümumdünya Səhiyyə Təşkilatı tərəfindən geniş istifadə olunub. Pandemiya dövründə ölkəmiz humanitar missiya ilə çıxış edərək 80-dən çox ölkəyə maddi yardım və humanitar dəstək göstərdi. Həmçinin Ümumdünya Səhiyyə Təşkilatına 10 milyon ABŞ dolları məbləğində ianə olunmuş və bu vəsaitin yarısı Qoşulmama Hərəkatının üzv dövlətlərinə birbaşa ayrılıb.

Bu fikirləri AZƏRTAC-a açıqlamasında Milli Məclisin deputatı, Yeni Azərbaycan Partiyasının İdarə Heyətinin üzvü Cavid Osmanov bildirib.

Deputatın sözlərinə görə, Prezident İlham Əliyev Azərbaycanın pandemiyanın ilk günləri və aylarında peyvənd millətçiliyinə qarşı açıq şəkildə etirazını bildirən ölkələrdən biri olduğunu öz çıxışında qeyd etdi. Bildirildi ki, bəzi zəngin ölkələr onlara lazım olduğundan ola bilsin üç və ya dörd dəfə çox peyvəndləri tədarük edir və bununla da digər ölkələri peyvəndlərə çıxışdan məhrum edirdi. Digər ölkələrin çıxılmaz vəziyyətdə olduğu bir vaxtda zəngin ölkələr peyvəndlərin mütləq əksəriyyətindən istifadə edirdi. Azərbaycanın peyvənd millətçiliyinə qarşı mübarizəsi Beynəlxalq Millətlər Təşkilatı tərəfindən də dəstəklənib.

Ölkələr arasında əməkdaşlıq və qarşılıqlı fəaliyyət üçün Bandunq prinsiplərini əsas tutan Azərbaycan Qoşulmama Hərəkatının sədri olduğu müddətdə ədalətsizliyə, beynəlxalq hüququn pozulmasına, müxtəlif münaqişələrə qarşı sərgilənən selektiv yanaşmaya və ayrı-seçkiliyə qarşı mübarizə aparmış və bundan sonra da bu xətti davam etdirəcəkdir. Azərbaycan özü uzun illər dünyada ən böyük ədalətsizliklə üzləşmiş ölkələrdən biri olub. Ərazisinin 20 faizi Ermənistan tərəfindən işğal edilən Azərbaycan etnik təmizləmə ilə üzləşmiş ölkədir. Bir milyon azərbaycanlı qaçqın və məcburi köçkün vəziyyətinə düşmüş, tarixi və dini irsimiz erməni işğalçıları tərəfindən yer üzündən silinib. Azərbaycan xalqı ədalətli mübarizə apararkən Qoşulmama Hərəkatının üzv dövlətləri bu haqlı mübarizəni dəstəkləyiblər. Belə ki, Qoşulmama Hərəkatında təmsil olunan ölkələr Vətən müharibəsi dövründə anti-Azərbaycan mahiyyətli bəyanatı, Azərbaycana qarşı ittihamı blokladılar və bununla da ermənipərəst qlobal qüvvələrin Azərbaycana qarşı hücumuna mane oldular.

“Qoşulmama Hərəkatı Parlament Şəbəkəsinin Bakı konfransında çıxış edən Prezident İlham Əliyev Minsk qrupu haqqında da fikirlər səsləndirərək onun münaqişənin əbədi olmasını istəyənlərin əlində alətə çevrildiyini vurğuladı. Azərbaycan xalqı təqribən 30 il ərzində gözləyirdi ki, beynəlxalq ictimaiyyət ədalətsizliyə və işğala son qoyulmasına yardım edəcək. Bu məqsədlə ATƏT-in 1992-ci ildə təsis etdiyi Minsk qrupu əslində münaqişənin həll yolunu tapmalı idi. Lakin Minsk qrupunun fəaliyyətinin yeganə məqsədi münaqişəni dondurmaq və torpaqlarımızı əbədi işğal altında saxlamaqdan ibarət oldu. Dövlətimizin başçısı bildirdi ki, Azərbaycanın münaqişəni həll etməsindən, işğala son qoymasından, özünün ərazi bütövlüyünü hərbi-siyasi yollarla bərpa etməsindən sonra Minsk qrupuna ehtiyac yoxdur və artıq bu qrupa əlvida deyilib. Ermənistan və digərlərinin onu həyata qaytarmağa çalışmaq cəhdləri mənasızdır. Bu mümkün olacaq hal deyil. ATƏT-in Minsk qrupu ilə bağlı hər hansı spekulyasiya nəinki qeyri-məhsuldardır, eyni zamanda, regionda mümkün sülhün bərqərar olması üçün dağıdıcı təsirə malikdir. 2020-ci il noyabrın 10-da 44 gün sürən Vətən müharibəsi nəticəsində Ermənistan kapitulyasiya edərək məğlubiyyətini etiraf etməyə məcbur olub. Münaqişənin dinc həllinin yeganə yolu Ermənistana qarşı sanksiyaların tətbiqi idi. Əfsuslar olsun ki, heç bir sanksiya tətbiq edilmədi və əksinə, Ermənistan Azərbaycanla müqayisədə bəzi ermənipərəst siyasətçilərdən getdikcə daha çox dəstək alırdı. Ölkə başçısı onu da vurğuladı ki, Ermənistan-Azərbaycan münaqişəsi ilə bağlı vəziyyət təkcə regional deyil, qlobal məsələdir. Çünki bu, təkcə beynəlxalq hüququn təməl prinsiplərinin tam pozulması deyil, həm də BMT Təhlükəsizlik Şurasının qətnamələrinin kobud pozulması və onlara məhəl qoyulmaması halı idi”, - deyə Cavid Osmanov qeyd edib.

Deputat bildirib ki, 1993-cü ildə BMT Təhlükəsizlik Şurası erməni qoşunlarının Azərbaycan ərazisindən dərhal, tam və qeyd-şərtsiz çıxarılması ilə bağlı 4 qətnamə qəbul etmişdi. Qoşulmama Hərəkatı isə Azərbaycanın haqq işini dəstəkləyən və məqamı çatanda bu sahədə lazimi addımı atan beynəlxalq təsisat oldu. Bu təsisat təkcə ölkələr üçün maraqlarını müdafiə etmək və bir-birini dəstəkləmək platforması deyil, beynəlxalq arenada daha fəal rol oynamaq üçün platforma da ola bilər. Azərbaycanın sədr qismində irəli sürdüyü təşəbbüslər də məhz Qoşulmama Hərəkatının institusional inkişafına yönəlib.