CENEVRƏDƏ AZƏRBAYCAN FOTOQRAFLARININ SƏRGİSİ AÇILMIŞDIR
Azərbaycanın BMT-nin Cenevrə bölməsindəki nümayəndəliyindən AZƏRTAC-a bildirmişlər ki, Cenevrənin Millətlər sarayında Azərbaycan fotoqraflarının “Mədəniyyətlərin görüşdüyü ölkə: güc müxtəliflikdədir” mövzusunda sərgisi açılmışdır.
Sərgini BMT-nin Cenevrə bölməsinin baş direktoru, BMT baş katibinin müavini Sergey Orconikidze açaraq bildirmişdir ki, fotosərgi Azərbaycanın BMT-nin müxtəliflik və dözümlülük kimi əsas dəyərlərinə tərəfdar olmasını sübut edir. S.Orconikidze çoxsaylı etnik və dini qrupların dinc yanaşı yaşadığı Azərbaycan cəmiyyətində tolerantlıq ənənələrindən danışaraq əmin olduğunu bildirmişdir ki, ölkənin rəngarəng etnik və dini palitrası ilə tanış edən fotoşəkillər sərgiyə gələnlərdə böyük maraq doğuracaqdır.
O, müxtəlif mədəniyyətlər və sivilizasiyalar arasında BMT-nin himayəsi altında keçirilən dialoqa ölkəmizin töhfəsini yüksək qiymətləndirərək “Sivilizasiyalar alyansı” təşəbbüsünün gerçəkləşdirilməsində Azərbaycanın rolunu xüsusi vurğulamışdır.
Tədbirdə Genevrədə akkreditə olunmuş diplomatik korpusun, beynəlxalq qurumların və qeyri-hökumət təşkilatlarının nümayəndələri, habelə İsveçrədə təhsil alan azərbaycanlı tələbələr və bu ölkədə yaşayan soydaşlarımız iştirak etmişlər.
Bölmənin digər xəbərləri
