DAŞKƏNDDƏ AZƏRBAYCAN XALQ CÜMHURİYYƏTİNİN 90 İLLİK YUBİLEYİ MÜNASİBƏTİLƏ MƏRASİM OLMUŞDUR
AZƏRTAC-ın xüsusi müxbiri xəbər verir ki, ölkəmizin Özbəkistandakı səfirliyində Azərbaycan Xalq Cümhuriyyətinin 90 illik yubileyi münasibətilə mərasim keçirilmiş, buraya Daşkəndin ali məktəblərində təhsil alan tələbələr dəvət olunmuşlar.
Əvvəlcə tələbələr Heydər Əliyevin səfirliyin foyesindəki büstü önünə əklil və çiçək dəstələri qoymuş, burada ulu öndərin həyat və fəaliyyəti, Heydər Əliyevin müxtəlif dövrdə dünya dövlətlərinin rəhbərləri ilə görüşlərini əks etdirən fotoşəkillərə baxmış, ümummilli lider haqqında Bakıda nəfis şəkildə çap edilmiş kitablarla tanış olmuşlar.
Tələbələri Azərbaycanın Özbəkistandakı səfiri Namiq Abbasov salamlamış, cəmi 23 ay yaşamış cümhuriyyətin yaranma tarixi haqqında ətraflı məlumat vermiş, dövlətin apardığı xarici siyasət, qısa müddət ərzində gördüyü tarixi işlərdən danışmışdır.
Səfir müstəqilliyini yenidən bərpa etdikdən sonra Azərbaycanın düşdüyü çətin şərait haqqında məlumat vermiş, belə bir dövrdə məhz Heydər Əliyev kimi dahi siyasi xadimin Bakıya dəvət edildiyini bildirmiş, qısa müddət ərzində ölkədə siyasi sabitlik yaradıldığını, Azərbaycanda baş qaldıran silahlı dəstələrin qanunun gücü ilə zərərsizləşdirildiyini qeyd etmişdir.
Namiq Abbasov hazırda Azərbaycanda aparılan iqtisadi islahatlar, Emənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində ölkəmizin atdığı addımlar haqqında məlumat vermiş, Azərbaycan Prezidenti İlham Əliyevin dəfələrlə müxtəlif görüşlərdə və tədbirlərdə dediyi bir fikri misal çəkmişdir: “Azərbaycanın ərazi bütövlüyü müzakirə mövzusu ola bilməz”.
Tələbələr “Azərbaycan deyəndə” sənədli filminə baxdıqdan sonra mərasimin ikinci hissəsi səfirliyin həyətində davam etdirilmişdir. Yusif Əliyev, Aynur Abdullayeva xalq mahnıları və təsniflərimizi, İlham Abdullayev sazda qədim el havalarını ifa etmişlər.
Tədbirdə Azərbaycanın ədəbiyyatı, incəsənəti, mədəniyyəti və tarixi ilə bağlı viktorina, rəqs yarışması keçirilmiş, qaliblərə səfirliyin hədiyyələri verilmişdir.
Bölmənin digər xəbərləri
