DAXİLİ İŞLƏR NAZİRLİYİ MƏTBUAT XİDMƏTİNİN MƏLUMATI
Respublikanın daxili işlər oqranları tərəfindən ölkədə kriminogen duruma nəzarət olunması, sabitliyin və ictimai asayişin qorunması, cinayətkarlıqla mübarizə və istintaqdan yayınan çinayətkarların axtarılıb tutulması sahəsində ardıcıl və məqsədyönlü əməliyyat-axtarış tədbirləri davam etdilir.
Sentyabrın 6-da Daxili İşlər Nazirliyinin Mütəşəkkil Cinayətkarlıqla Mübarizə İdarəsi əməkdaşlarının keçirdikləri daha bir əməliyyat uğurla başa çatmışdır. Nəticədə adam oğurluğu kimi təhlükəli cinayət hadisəsi törətmiş 5 nəfərdən ibarət cinayətkar dəstə ifşa olunaraq yaxalanmışdır.
Dəstənin üzvləri - Lalə Şirinova, Nargilə Əliyeva, Ruslan İsgəndərov, Yaqub Cəfərov və Cavid Şükürov sentyabrın 5-də Gədəbəy rayonundan Bakı şəhərinə qonaq gəlmiş 16 yaşlı Mehrab Tağıyevi aldatma yolu ilə oğurlayaraq, onun buraxılması üçün valideynlərindən 10 min ABŞ dolları tələb etmiş, əks halda Mehrabı öldürəcəklərini bildirmişlər.
Bu barədə məlumat daxil olan kimi idarənin əməkdaşları tərəfindən təxirəsalınmadan hazırlanmış, hərtərəfli düşünülmüş və yüksək peşəkarlıqla həyata keçirilmiş tədbirlər nəticəsində cinayətkar dəstənin fəal üzvlərindən ikisi - Lalə Şirinova və Nargilə Əliyeva dünən Bakı şəhərində müəyyən edilərək tutulmuşlar. Onların ətrafında keçirilmiş əməliyyat-axtarış tədbirləri və istintaq hərəkətləri ilə oğurlanmış Mehrab Tağıyevin saxlanıldığı yer aşkarlanmış, o, girovluqdan azad edilərək valideynlərinə qaytarılmışdır.
Cinayətkar dəstənin digər üzvlərinin ölkənin hüdudlarını tərk etmək niyyətləri də məlum olduqdan sonra Daxili İşlər Nazirliyinin xüsusi tədbirlər planı işə salınmış, onların gizlənəcəyi və sərhədi keçə biləcəyi ehtimal olunan yerlərin əməliyyat müşahidəsinə götürülməsi təmin edilmişdir. Sərhəd Qoşunları ilə keçirilmiş tədbirlər nəticəsində cinayətkar dəstənin qalan üzvləri - Ruslan İsgəndərov, Yaqub Cəfərov və Cavid Şükürov sentyabrın 7-də səhər saat 5.30 radələrində Qusar rayonu ərazisində, Azərbaycan-Rusiya sərhədi yaxınlığında yaxalanmışlar.
Faktla bağlı başlanmış cinayət işi üzrə istintaq aparılır.
Bölmənin digər xəbərləri
