Dövlət İmtahan Mərkəzinin Bərdədə keçirdiyi imtahanlar uğurla başa çatıb
Bərdə, 15 aprel, Tahir Ağaməmmədov, AZƏRTAC
Dövlət İmtahan Mərkəzi (DİM) aprelin 15-də Bərdə şəhərində ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul olmaq istəyən əvvəlki illərin məzunları, əvvəlki illərdə təhsil sənədi ala bilməyən və eksternat qaydasında imtahan verən məzunlar və martda keçirilən buraxılış imtahanlarının birinci mərhələsində üzrlü səbəbdən iştirak edə bilməyən cari ilin məzunları (IX sinif) üçün imtahanlar keçirib.
DİM-nin Bərdə regional bölməsindən AZƏRTAC-ın bölgə müxbirinə bildirilib ki, imtahanda Bərdədən, həmçinin Ağdam, Ağcabədi, Tərtər, Xocavənd, Beyləqan, Yevlax, Füzuli və Laçından olan 727 məzun iştirak edib. Bərdə şəhər 6 və 8 nömrəli tam orta məktəblərdə keçirilən imtahanlar 5 imtahan rəhbəri və 62 nəzarətçi-müəllim tərəfindən idarə olunub.
Təhlükəsizliyin təminatı məqsədilə imtahan keçirilən binalara polis, Fövqəladə Hallar Nazirliyinin Dövlət Yanğından Mühafizə Xidmətinin əməkdaşları və tibb işçiləri cəlb edilib.
Bütün imtahan mərkəzlərində imtahanlar mövcud təlimata uyğun aparılıb və heç bir qanun pozuntusuna yol verilmədən müəyyən olunmuş vaxtda uğurla başa çatıb.
Bölmənin digər xəbərləri
