Bakı, 9 sentyabr, AZƏRTAC

Cari ilin ilk yanvar-avqust aylarında İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətində istehlakçılar tərəfindən daxil olan 3843 müraciətə baxılıb.

Dövlət Xidmətindən AZƏRTAC-a bildirilib ki, 1531 müraciət təmin olunub, 1349 müraciətə dair izahat və tövsiyə verilib, 462 müraciət üzrə araşdırmalar davam edir, 264 müraciət aidiyyəti üzrə orqanlara göndərilib, zəruri sənədlər təqdim edilmədiyi üçün 151 müraciətin baxılması dayandırılıb, 55 müraciətə dair ərizədə qeyd olunan faktlar aşkarlanmayıb, 31 müraciətin aidiyyəti üzrə göndərilməsi tövsiyə olunub. Müraciətlərin 59 faizi malların qüsurlu və keyfiyyətsiz olmasına, 4 faizi müqavilə şərtlərinin pozulmasına, 22 faizi digər istehlakçı hüquqlarının pozulmasına, 14 faizi istehlakçıların hesabda, çəkidə və qiymətdə aldadılmasına, 1 faizi istehlakçılara zəruri və düzgün məlumatların verilməməsinə dair olub. Nəticədə 213 min 774 manat istehlakçılara qaytarılıb, 16 min 821 manat dəymiş ziyan ödənilib.