DÜNYADA SAATLARIN ƏQRƏBLƏRİNİN MÖVSÜMİ ÇƏKİLMƏSİ TƏCRÜBƏSİ MÜZAKİRƏ OLUNUR
AZƏRTAC Rusiya informasiya agentliklərinə istinadla xəbər verir ki, rusiyalıların 46 faizi yay vaxtına keçilməsinin ləğvinə tərəfdardır. Müvafiq qanun layihəsi bu günlərdə Dövlət Dumasında müzakirəyə çıxarılmışdır. Saat əqrəblərinin çəkilməsinin lazım olub-olmadığı barədə mübahisələr bütün dünyada gedir. Qərbdə insanları ilk növbədə əqrəblərin mövsümi çəkilməsinin sağlamlığa təsiri məsələsi narahat edir.
Yay vaxtına ilk dəfə düz yüz il əvvəl İngiltərədə keçilmişdir. Rusiya isə yay və qış vaxtı ilə 1917-ci ildən yaşamağa başlamışdır. Doğrudur, 1930-cı ildə bundan imtina edilmişdir. Yalnız 1981-ci il aprelin 1-də yay vaxtı bərpa edilmişdir. O zamandan saatların əqrəbləri bütün ölkədə ildə iki dəfə çəkilir və hər dəfə də belə bir sual ortaya çıxır: Bu, kimə lazımdır?.
SuperJob.ru portalında sonuncu sosioloji sorğunun nəticələrinə görə, rusiyalıların əksəriyyəti bu ideyanı dəstəkləmir. Respondentlərin 46 faizi əqrəblərin çəkilməsinin ləğv olunmasına tərəfdardır. Onların fikrincə bu, orqanizm üçün böyük stresdir, xəstəliklərin ağırlaşmasına gətirib çıxarır. Sorğu iştirakçıları əmindirlər ki, xəstəlik kağızlarına elektrik enerjisinə qənaətdən əldə olunmuş vəsaitlə müqayisədə daha çox pul xərclənir.
Bundan başqa, saat əqrəblərinin çəkilməsinin iqtisadi səmərəsi iqtisadçıların özündə də şübhə doğurur. İlkin hesablamalara görə, bu, ildə 4,4 milyon kilovat-saat enerjiyə qənaət etməyə imkan verir, lakin real məbləğə çevirəndə cüzi rəqəm alınır.
Yeri gəlmişkən, ABŞ-da hesablamışlar ki, saatların əqrəblərinin çəkilməsindən sonra xəsarət alanların sayı 7 faiz artır, əmək məhsuldarlığı da elə o qədər azalır. Bəzi ölkələrdə artıq qərara gəlmişlər ki, saatların çəkilməsi nəticəsində itkilər iqtisadi qazancı üstələyir. 2005-ci ilin martında Qazaxıstan, ondan əvvəl isə Estoniya, Özbəkistan, Tacikistan və Türkmənistan əqrəbləri irəli-geri çəkməkdən imtina etmişlər. Həmin ideya artıq neçə ildir ki, Avropa İttifaqında da müzakirə olunur.
Bölmənin digər xəbərləri
