ƏDL-in sammitində 20-yə yaxın məsələ müzakirə olunub
Qahirə, 1 aprel, AZƏRTAC
Martın 31-də Tunisdə Ərəb Dövlətləri Liqasının (ƏDL) yüksək səviyyəli 30-cu beynəlxalq yubiley sammiti öz işini yekunlaşdırıb.
AZƏRTAC xəbər verir ki, ərəb ölkələrinin dövlət və hökumət başçılarının qatıldıqları toplantıda təşkilata üzv dövlətlər gündəlikdə olan Colan yüksəkliklərinin ABŞ tərəfindən İsrailin ərazisi kimi tanınması məsələsini müzakirə ediblər, bu qərarın beynəlxalq prinsipləri pozduğunu və heç bir hüquqi qüvvəsinin olmadığı barədə yekdil mövqe ifadə ediblər.
Qeyd edilib ki, ƏDL-ə üzv dövlətlər ABŞ-ın bu qərarı ilə əlaqədar BMT-nin Təhlükəsizlik Şurasının qətnaməsinin qəbul edilməsinə çalışacaqlar. Ərəb dövlətlərinin qəbul etdiyi yekun sənəddə bildirilir ki, ərəb dövlətləri BMT-nin Təhlükəsizlik Şurasına qətnamənin layihəsini təqdim edəcək.
ƏDL-in baş katibi Əhməd Əbul Geyt bildirib ki, BMT-də qətnamənin təşviqi ilə Küveyt məşğul olacaq. O xüsusi vurğulayıb ki, ABŞ-ın Colan yüksəklikləri barədə verdiyi qərarın heç bir hüquqi əsası yoxdur.
Ərəb dövlətlərinin bu məsələdə mövqeyini zirvə toplantısında iştirak edən BMT-nin baş katibi Antonio Quterreş və Avropa İttifaqının xarici işlər və təhlükəsizlik siyasəti üzrə ali nümayəndəsi Federika Moqerini də dəstəkləyib.
Tunisdə keçirilən sammitdə, həmçinin Fələstin məsələsinə da baxılıb. BMT-nin baş katibi Antonio Quterreş qeyd edib ki, bu məsələ “iki dövlət” prinsipi əsasında həll olunmalıdır. Bu prinsipin reallaşması regionda sabitliyi və təhlükəsizliyi təmin edə bilər.
Sammitdə, həmçinin ərəb dövlətlərinin daxili işlərinə digər ölkələrin qarışmaması və ərəb milli təhlükəsizliyinin prioritetlərinin müəyyənləşdirilməsi sahəsində hərtərəfli konsepsiyanın hazırlanması təklif olunub.
Ümumilikdə, ƏDL-in 30-cu yubiley sammitində regionun əsas problemlərinə dair 20-yə yaxın məsələyə baxılıb, o cümlədən Liviya və Yəməndəki böhranlar, Sudanda sülhə və inkişafa dəstək, ərəb ölkələrinin təhlükəsizliyi və s. məsələlər nəzərdən keçirilib.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
