ELM VƏ TƏHSİL
“eTwinning Azərbaycan” layihəsi şagirdlər üçün müsabiqə elan edib
Bakı, 8 fevral, AZƏRTAC
“eTwinning Azərbaycan” layihəsi çərçivəsində şagirdlər üçün ənənəvi olaraq növbəti müsabiqə elan olunur. Müsabiqənin icra müddəti fevralın 28-dək davam edəcək.
Bu barədə AZƏRTAC-a Təhsil Nazirliyindən məlumat verilib. Bildirilib ki, istənilən yaş qrupuna aid olan şagirdlər “Mənim böyük ideyam” (My Big Idea) mövzusunda təqdimatlar hazırlayaraq müsabiqəyə fərdi və ya komanda şəklində müraciət edə bilərlər. Müsabiqəyə müraciət etmək üçün şagirdlər gündəlik rastlaşdığı bir problemi taparaq həmin mövzuda araşdırma aparacaq. Aşkar etdikləri problemi süni intellektdən və ya müasir texnologiya vasitələrindən istifadə edərək həlli yolunu təqdim edəcəklər. Şagirdlərin təklif etdikləri həll yeni bir innovasiya və ya ideya olmalıdır. Müsabiqə üçün təqdim edilən həll cəmiyyətə innovasiyanın gələcək üçün həyatı necə yaxşılaşdıracağını göstərməlidir.
Real dünya problemlərinin öhdəsindən gələ bilmək üçün şagirdlər rəqəmsal düşüncə, proqramlaşdırma, tənqidi düşüncə və problemləri həlletmə bacarıqlarını nümayiş etdirmiş olacaqlar.
Layihə təklifləri videoçarx, təqdimat, esse formatında ola bilər.
Müraciət zamanı təqdim olunan material aşağıda qeyd olunan meyarlara cavab verməlidir:
- Təqdimat videoformatda maksimum 3 dəqiqə, təqdimat formatında 7-10 slayd, esse formatında 2 səhifə (A4, Arial 12 şriftində) olmalıdır;
- İstifadə olunan dil sərbəstdir;
- Materiallarda “eTwinning” loqosunun olması mütləqdir;
- Müraciət fərdi və komanda şəklində ola bilər. (Komandaya cəlb olunacaq şagird sayı 5 nəfərdən artıq olmamalıdır);
- Komanda üzvləri müxtəlif sinif və yaş qrupuna aid ola bilər, lakin komanda üzvlərinin eyni məktəbdən olması mütləqdir. Məktəb üzrə müraciət edən komanda sayında limit yoxdur.
Qeyd edək ki, müraciət etmək istəyənlər təqdimatlarını fevralın 28-dək [email protected] poçt ünvanına göndərməlidirlər.