Göyçayda səhiyyə xidmətinin səviyyəsi yüksəlmişdir
Göyçay, 10 iyul (AZƏRTAC). Cari ilin 6 ayında Göyçay Mərkəzi Rayon Xəstəxanasının qanköçürmə, travmatologiya, qəbul şöbələri və poliklinika şöbəsinin ikinci mərtəbəsi əsaslı təmir edilmiş, doğum şöbəsində iki əlavə doğuş zalı yaradılmışdır.
AZƏRTAC xəbər verir ki, xəstəxananın nəzdində “Gənclərin dostu” sağlamlıq mərkəzi yaradılmış, oraya tibbi avadanlıq, kompyuter və soyuducu verilmişdir. Ailə planlaşdırılması və reproduktiv sağlamlıq mərkəzi üçün yeni otaqların tikintisi başa çatmaq üzrədir. Uşaq xəstəxanasının laboratoriya şöbəsinin həkim otaqlarında cari təmir işləri aparılmış, yeni avadanlıq quraşdırılmışdır.
Qarabaqqal kənd həkim məntəqəsində təmir işləri aparılmış, Yekəxana, Şahsoltanlı və Xəlilli kənd tibb məntəqələri müvafiq binalarda yerləşdirilmişdir. Səhiyyə Nazirliyi tərəfindən xəstəxanaya ümumi dəyəri 30 min 751 manat olan ultrasəs müayinə aparatı və iki ədəd kompyuter avadanlığı, çərrahiyyə şöbəsinə 7535 manat dəyərində mini assistent aparatı verilmişdir. Xəstəxanaya 23 min 560 manat dəyərində yumşaq inventar alınmışdır.
Rayon təcili və təxirəsalınmaz tibbi yardım stansiyasına hər birinin dəyəri 92 min manat olan “Mersedes” markalı iki maşın verilmişdir. Həmçinin, xəstəxanaya sidik kisəsində və yollarında törəmələrin yoxlanılması üçün 65 min manat dəyərində sistoskop aparatı, bir neçə mikroskop və EKQ aparatları alınmışdır. Səhiyyə Nazirliyi tərəfindən rayona dəyəri 7 min manat olan cərrahiyə dəsti verilmişdir. Xəstəxananın bütün şöbələri, poliklinika şöbəsinin həkim otaqları yeni avadanlıqla təmin edilmişdir.
Yaponiya hökumətinin “Ot kökləri və insan təhlükəsizliyi” qrant layihəsi çərçivəsində rayon təcili və təxirəsalınmaz tibbi yardım stansiyasının binası əsaslı təmir edilərək istifadəyə verilmiş, tibb ocağı Səhiyyə Nazirliyi tərəfindən mebel və inventarlarla təmin olunmuşdur.
Bölmənin digər xəbərləri
