CƏMİYYƏT
Göyçayda vətəndaşların əmanətlərinin qaytarılması prosesinə hazırlıq görülür
Göyçay, 22 may (AZƏRTAC). Keçmiş SSRİ Əmanət Bankının əmanətçilərinə fərdi birdəfəlik ödəmələrin verilməsi ilə bağlı Prezident İlham Əliyevin 2012-ci il 14 mart tarixli Fərmanına əsasən Göyçayda vətəndaşların əmanətlərinin qaytarılması prosesinə hazırlıq görülür.
Kapital Bankın Göyçay filialından AZƏRTAC-a bildirmişlər ki, 2012-ci il iyunun 1-dən 2013-ci il dekabrın 31-dək davam edəcək bu proses ilə əlaqədar bankda 2 xüsusi otaq ayrılmışdır. Həmçinin bankın inzibati binasının qarşısında, şəhərin müxtəlif yerlərində və kəndlərdə müraciət və sənədlərin qeydiyyatı, birdəfəlik ödəmələrin aparılması və digər qaydalarla bağlı məlumat lövhələri asılmışdır. Bu günədək bankın arxivində olan kartlar əsasında bütün məlumatlar kompyuterə yığılmışdır. İyunun 1-dən başlayaraq vətəndaşlar əmanət kitabçaları və şəxsiyyət vəsiqələri ilə banka müraciət edə bilərlər.
Əmanət kitabçalarının qeydiyyata alınması prosesi bu il dekabrın 31-dək davam edəcəkdir.