Göygöl, 25 iyun, Rauf Hacıyev, AZƏRTAC

Prezident İlham Əliyevin tövsiyə və tapşırığına müvafiq olaraq, bölgələrdə kənd təsərrüfatı işlərinin gedişinin, fermerlərin, sahibkarların qayğılarının, təklif və istəklərinin öyrənilməsi, aqrar sektorun inkişaf perspektivlərinin müəyyənləşdirilməsi və operativ tədbirlərin görülməsi məqsədilə yaradılan işçi qrupu iyunun 24-də Göygöl və Daşkəsən rayonlarında olub.

AZƏRTAC xəbər verir ki, işçi qrupun üzvləri əvvəlcə Göygöl rayonunda təsərrüfatlara baş çəkib, fermerlərlə, sahibkarlarla görüşüb, Süni Mayalama Mərkəzində işlərin gedişi ilə maraqlanıblar.

Sonra Göygöl Rayon İcra Hakimiyyətində mütəxəssislərin, fermer və təsərrüfat sahiblərinin, həmçinin ictimaiyyət nümayəndələrinin iştirakı ilə müşavirə keçirilib.

Müşavirəni açan Göygöl Rayon İcra Hakimiyyətinin başçısı Arif Seyidov kənd təsərrüfatının inkişafı ilə bağlı həyata keçirilən tədbirlərdən, qazanılan uğurlardan danışıb. Bildirilib ki, rayonda taxılçılıq, üzümçülük, heyvandarlıq, meyvəçilik, quşçuluq və digər sahələrin dinamik inkişafına nail olunub. Hazırda rayonda bir neçə emal müəssisəsi fəaliyyət göstərir. Lakin bu, heç də son hədd deyil. İstehsalın artırılması, əkin sahələrinin genişləndirilməsi, mal-qaranın cins tərkibinin daha da yaxşılaşdırılması üçün kifayət qədər imkanlar var.

Müşavirədə işçi qrupun rəhbəri Azər Əmiraslanov çıxış edərək, rayonun aqrar və iqtisadi imkanlarını yüksək qiymətləndirib. Bu imkanları daha da genişləndirmək və artırmaq üçün Göygöl rayonunun böyük potensiala malik olduğu diqqətə çatdırılıb.

Prezident İlham Əliyevin qeyri-neft sektorunun inkişafı ilə bağlı qarşıya qoyduğu konkret vəzifələri diqqətə çatdıraraq, yeni mərhələdə aqrar sektorun inkişaf istiqamətlərindən danışan A.Əmiraslanov aqrar sahədə inkişafın əsas təməlinin toxumçuluq təşkil etdiyini vurğulayıb, milli toxumçuluq sisteminin yaradılmasının zəruriliyini bildirib.

Kənd təsərrüfatında ənənəvi sahələrin inkişafının yeni prinsiplərindən danışan işçi qrupunun rəhbəri bu istiqamətdə dövlət dəstəyinin gücləndirildiyini, pambıqçılıq və baramaçılıq sahələrinə də subsidiyaların veriləcəyini söyləyib. Həmçinin torpaqlardan səmərəli istifadə edilməsinin, ərzaq idxalının azaldılması istiqamətində ciddi işlərin aparılmasının önəmi vurğulanıb.

Müşavirədə rayonda ənənəvi sahələrlə yanaşı, digər sahələrin də perspektivlərindən bəhs olunub, bu sahələrdə böyük işlərin görülə biləcəyi qeyd edilib.

Sonda iştirakçıların sualları cavablandırılıb, təkliflər verilib. Səsləndirilən təkliflər baxılmaq üçün nəzarətə götürülüb.

X X X

İşçi qrupun üzvləri günün ikinci yarısında Daşkəsənə gəlib və fermerlərə məxsus heyvandarlıq və arıçılıq təsərrüfatlarına, əkin sahələrinə baxış keçiriblər.

Sonra sahibkarların və kənd təsərrüfatı mütəxəssislərinin iştirakı ilə geniş müşavirə olub.

Müşavirədə Daşkəsən Rayon İcra Hakimiyyətinin başçısı Əhəd Abıyev çıxış edərək bildirib ki, rayonda 60 min hektara yaxın əkinəyararlı torpaq sahəsi var. Bunun 2500 hektarı əkin, 63 hektarı çox illik bağlar, 10 min hektarı biçənək, 46 min hektarı örüş-otlaq sahələri kimi istifadə olunur. Rayonda 27 min baş iribuynuzlu mal-qara, 102 min başdan çox xırdabuynuzlu davar bəslənilir. Daşkəsəndə kənd təsərrüfatının mövcud vəziyyətini statistik rəqəmlərlə diqqətə çatdıran Əhəd Abıyev gələcəkdə görüləcək işlərdən də danışıb.

Tədbirdə çıxış edənlər rayonda ət və süd emalı müəssisələrinin, quşçuluq və balıqçılıq təsərrüfatlarının yaradılmasının vacibliyini bildiriblər. Cır-yabanı giləmeyvələrin emalının və dərman bitkilərinin sənaye üsulu ilə istehsalının qurulması da məqsədəuyğun hesab olunub. Bildirilib ki, arıçılığın inkişafı üçün rayonda münbit şərait var və bu sahənin inkişafı yeni iş yerlərinin açılmasına təkan verə bilər.

Müşavirədə iştirakçılar tərəfindən bir sıra suallar səsləndirilib, təkliflər verilib.

İşçi qrupun rəhbəri Azər Əmiraslanov səslənən təklifləri müsbət dəyərləndirərək qeyd edib ki, bu gün təklif kimi səslənən fikirlər sabah reallığa çevriləcək. Çünki Azərbaycan Prezidenti İlham Əliyev qeyri-neft sektorunun, əsasən də kənd təsərrüfatının inkişafına xüsusi diqqət göstərir və artıq aqrar sahədə yeni mərhələyə qədəm qoyulub. Ölkə üzrə rayonların ixtisaslaşması kənd təsərrüfatının müasir tələblər səviyyəsində və elmi əsaslarla inkişafını təmin edəcək.

Səsləndirilən müraciət və təkliflər qeydə alınıb, suallara aydınlıq gətirilib.