Gürcüstanda XI və XII sinif şagirdləri üçün buraxılış imtahanları ləğv olundu
Tbilisi, 1 fevral, AZƏRTAC
Gürcüstanda XII sinfi bitirən şagirdlər üçün buraxılış imtahanları ləğv olundu.
AZƏRTAC xəbər verir ki, bunu Gürcüstanın Baş naziri Mamuka Baxtadze fevralın 1-də keçirdiyi brifinqdə bildirib.
Baş nazir deyib: “Təhsil sistemində islahatların həyata keçirilməsi hökumətin əsas prioritetlərindən biridir. Təhsil, Elm, Mədəniyyət və İdman Nazirliyi 2019-cu ildə attestat imtahanlarının yalnız XI sinif şagirdləri üçün ləğv olunması barədə qərar qəbul edib. Bu, düzgün yanaşmadır və məsələ ilə bağlı məsləhətləşmələr aparıldı. Nəticədə buraxılış imtahanlarının həm XI, həm də XII sinif şagirdləri üçün ləğv olunması haqqında qərar qəbul edildi”.
Xatırladaq ki, bu yaxınlarda təqdim olunmuş təhsil sisteminin yeni modelinə əsasən, 2019-cu ildə ictimai məktəblərdə buraxılış imtahanlarının ləğvi yalnız XI sinif şagirdlərinə şamil olunurdu. XII sinif şagirdlərinin bu imtahanlardan azad edilməməsi cəmiyyətdə ciddi narazılıq doğurmuşdu.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
