GÜRCÜSTANIN TƏHSİL VƏ ELM NAZİRİ MARNEULİYƏ GƏLMİŞDİR
AZƏRTAC-ın xüsusi müxbiri xəbər verir ki, aprelin 14-də Gürcüstanın təhsil və elm naziri Qiya Nodiya ölkədə dilin müdafiəsi günü ilə əlaqədar əsasən azərbaycanlıların yaşadığı Kvemo Kartli-Borçalı bölgəsinin Marneuli rayonunda keçirilən tədbirlərdə iştirak etmişdir.
Nazir rayon mərkəzində yerli pedaqoqlarla görüşmüş, qeyri-gürcü məktəblərində dövlət dilinin tədrisi ilə maraqlanmışdır. Q.Nodiya Gürcüstan hökumətinin qeyri-gürcü məktəblərində, o cümlədən azərbaycandilli məktəblərdə gürcü dilinin tədrisinin yaxşılaşdırılmasına qayğını əsirgəmədiyini vurğulamışdır.
Görüşdə müəllimlərin maaşlarının artırılması, qeyri-gürcü abituriyentlərin Gürcüstanın ali məktəblərinə qəbul imtahanlarını ana dillərində vermələri və s. məsələlərə toxunulmuşdur. Azərbaycanlı şagirdlər gürcü dilində şeirlər oxumuşlar.
Tədbirdə Marneuli rayon rəhbərliyi və bölgənin qubernatoru David Kirkitadze iştirak etmişlər.
Bölmənin digər xəbərləri
