DÜNYA
Gürcüstanın Tsxaltubo kurortunda yerləşən 14 sanatoriya satışa çıxarılıb
![Gürcüstanın Tsxaltubo kurortunda yerləşən 14 sanatoriya satışa çıxarılıb](/files/2022/2/1200x630/1657315795327211377_1200x630.jpg)
Tbilisi, 9 iyul, AZƏRTAC
Gürcüstan Dövlət Əmlakının İdarə Olunması Agentliyi Tsxaltubo kurortunda yerləşən 14 sanatoriyanı satışa çıxarıb. Sanatoriyalar hərrac yolu ilə satılacaq.
AZƏRTAC xəbər verir ki, agentliyin məlumatına görə, Gürcüstan hökuməti “Tsxaltubonun yeni həyatı” adlı layihə hazırlayıb. Layihə çərçivəsində kurort sahəsinin bərpası nəzərdə tutulub və bu işlərə 500 milyon lari həcmində investisiya yönəldiləcək. Məqsəd Tsxaltubonu dünya səviyyəli müasir balneoloji kurorta çevirməkdir. Satışa çıxarılan sanatoriyaların ümumi dəyəri 50 milyon lari (təxminən 16 milyon ABŞ dolları) təşkil edir. Hərracın avqustun 4-də keçirilməsi nəzərdə tutulur.
Satışa çıxarılan obyektlərin ən bahalısı “Uşişroeba” sanatoriyasıdır. Obyektin ümumi torpaq sahəsi 25 hektardan çox, binasının ümumi sahəsi təqribən 7 min kvadratmetrdir. Obyektin ümumi dəyəri isə 8,47 milyon laridir (təqribən 3 milyon dollar). Ən ucuz sanatoriya isə “Geoloq” adlanır. Obyekt 1,42 milyon lari məbləğində qiymətləndirilib.
Qeyd edək ki, Tsxaltubo sanatoriyası Gürcüstanın ikinci ən böyük şəhəri olan Kutaisidən 7 kilometr aralıda, dəniz səviyyəsindən 100 metr yüksəklikdə yerləşir. Burada radonla zəngin mineral su mənbələri var.
Sovetlər dövründə Tsxaltuboda 19 sanatoriya və pansionat inşa edilib. SSRİ-nin süqutundan sonra sanatoriya obyektləri istifadəsiz qalıb və binaların əksəriyyətində Abxaziyadan olan qaçqınlar məskunlaşıb.
Xətayi Əzizov
AZƏRTAC-ın xüsusi müxbiri
Tbilisi