İQTİSADİYYAT
İqtisadi İnkişaf Nazirliyində geniş kollegiya iclası keçirilmişdir
Bakı, 19 yanvar (AZƏRTAC). Prezident İlham Əliyevin sədrliyi ilə Nazirlər Kabinetinin 2012-ci ilin sosial-iqtisadi inkişafının yekunlarına və 2013-cü ildə qarşıda duran vəzifələrə həsr olunmuş iclasında dövlət başçısı tərəfindən verilmiş tapşırıqların icrası ilə bağlı İqtisadi İnkişaf Nazirliyində geniş kollegiya iclası keçirilmişdir.
Nazirliyin mətbuat xidmətindən AZƏRTAC-a bildirmişlər ki, struktur bölmələrinin, tabelikdəki qurumların rəhbərlərinin iştirakı ilə keçirilmiş iclasda çıxış edən İqtisadi İnkişaf naziri, kollegiyanın sədri Şahin Mustafayev 2012-ci ildə qazanılmış iqtisadi nailiyyətlər barədə məlumat vermişdir. Qeyd edilmişdir ki, 2012-ci ildə ümumi daxili məhsul 2,2 faiz artmış, onun adambaşına düşən həcmi 5884,5 manat (7490,5 ABŞ dolları) təşkil etmiş, artıma qeyri-neft sektoru hesabına nail olunmuşdur. Ötən il qeyri-neft sektorunda artım 9,7 faiz təşkil etmiş, qeyri-neft sənayesi 7,8 faiz, kənd təsərrüfatı 5,8 faiz, tikinti 18 faiz, nəqliyyat 5 faiz, rabitə 15,9 faiz, turizm 18,8 faiz və s. artmışdır. İllik inflyasiya 1,1 faiz təşkil etmişdir. Bütün mənbələr hesabına iqtisadiyyata 22,1 milyard dollar investisiya yatırılmışdır ki, bunun 13,3 milyard dolları daxili, 8,8 milyard dolları isə xarici investisiyalardır.
Ötən ilin 11 ayında 152 ölkə ilə xarici ticarət dövriyyəsi 39,5 milyard dollar, xarici ticarət saldosu müsbət 22,6 milyard dollar təşkil etmiş, qeyri-neft ixracı 11,2 faiz artmışdır. Ölkənin strateji valyuta ehtiyatları 46 milyard dollar olmuşdur ki, bu da xarici dövlət borcundan təxminən 10 dəfə çoxdur. Məqsədyönlü dövlət proqramlarının uğurlu icrası nəticəsində regionlarda, Bakı şəhəri və onun qəsəbələrində abadlıq-quruculuq işləri davam etmiş, yeni müəssisələr, iş yerləri açılmışdır. Ötən il infrastruktur layihələrinin icrası, sənaye parklarının təşkili istiqamətində tədbirlər davam etdirilmişdir.
Keçən il sosial layihələr həyata keçirilmiş, əhalinin pul gəlirləri 13,8 faiz, əmək haqqı təqribən 10 faiz artmışdır. Ölkədə yoxsulluğun səviyyəsi 6 faizə, işsizliyin səviyyəsi isə 5,2 faizə enmişdir.
Sahibkarlığa göstərilən dövlət dəstəyi tədbirləri real bəhrələrini vermiş, ilin yekunlarına görə özəl bölmənin ÜDM-də xüsusi çəkisi 83 faiz təşkil etmişdir. Dövlət başçısının tapşırığına uyğun olaraq, İqtisadi İnkişaf Nazirliyində elektron xidmətlərin tətbiqi təmin edilmiş, sahibkarlara göstərilən elektron xidmətlərin sferası daha da genişləndirilmişdir.
İqtisadi İnkişaf naziri Şahin Mustafayev Nazirlər Kabinetinin 2012-ci ilin sosial-iqtisadi inkişafının yekunlarına və 2013-cü ildə qarşıda duran vəzifələrə həsr olunmuş iclasında dövlətimizin başçısı İlham Əliyev tərəfindən iqtisadiyyatın müxtəlif sahələri üzrə bir sıra tapşırıqların verildiyini vurğulamışdır.
Kollegiya iclasında dövlət başçısının makroiqtisadi sabitliyin qorunması, qeyri-neft sektorunun inkişafı, dövlət proqramlarının icrasının sürətləndirilməsi, sənayeləşmənin davam etdirilməsi, infrastruktur layihələrinin icrası, biznes mühitinin daha da yaxşılaşdırılması, sahibkarlığa dövlət maliyyə dəstəyinin gücləndirilməsi, əsas ərzaq məhsulları ilə özünü təminetmə səviyyəsinin yüksəldilməsi, əhalinin kommunal xidmətlərə tələbatının daha dolğun ödənilməsi, rəqabətqabiliyyətli məhsul istehsalının və xarici bazarlara çıxışın genişləndirilməsi, 2013-cü ilin İKT ili elan olunması ilə əlaqədar informasiya-kommunikasiya texnologiyalarının tətbiqinin genişləndirilməsi və s. istiqamətlərdə verdiyi göstərişlərin vaxtında və yüksək keyfiyyətlə icra olunması üçün nazirliyin müvafiq struktur bölmələrinə konkret tapşırıqlar verilmiş, Tədbirlər Planının hazırlanması qərara alınmışdır.
İclasda, həmçinin Azərbaycan iqtisadiyyatının, biznes və investisiya mühitinin təşviqi sahəsində nazirlik tərəfindən görülən işlər müzakirə edilmiş, bu sahədə tədbirlərin gücləndirilməsi, effektivliyinin artırılması istiqamətində tapşırıqlar verilmişdir.
Kollegiya iclasında bir sıra cari məsələlər də müzakirə olunmuşdur.