KİNOREJİSSOR RASİM İSMAYILOVUN XATİRƏSİ YAD EDİLMİŞDİR
Bakı, 17 aprel (AZƏRTAC). Aprelin 17-də Uşaq Kino Evində Əməkdar İncəsənət Xadimi, Dövlət Mükafatı laureatı, kinorejissor Rasim İsmayılova həsr olunmuş xatirə gecəsi, eyni zamanda rejissorun uşaqlar üçün çəkdiyi “Asif, Vasif, Ağasif” filminin yaradıcı heyəti ilə görüş keçirilmişdir.
Film Fondunun direktoru Cəmil Quliyev, Xalq rəssamı Rafis İsmayılov, Əməkdar Jurnalist Nadejda İsmayılova, bəstəkar Ruhəngiz Qasımova və başqaları R.İsmayılovun kino yaradıcılığından və insani keyfiyyətlərindən söhbət açmışlar.
Bildirilmişdir ki, Rasim İsmayılov 1936-cı il iyulun 13-də Bakıda anadan olmuşdur. Moskvada Ümumittifaq Dövlət Kinematoqrafiya İnstitutunun operatorluq fakültəsini bitirmiş, “Azərbaycanfilm” kinostudiyasında quruluşçu operator kimi fəaliyyətə başlamışdır. 1977-ci ildən isə burada quruluşçu rejissor kimi bir neçə bədii film çəkmişdir. O, 2004-cü il martın 3-də vəfat etmişdir.
Vurğulanmışdır ki, onun çəkdiyi “Yenilməz batalyon”, “Yaşamaq gözəldir, qardaşım”, “Torpaq. Dəniz. Od. Səma.”, “Yeddi oğul istərəm”, “Axırıncı aşırım”, “Sevil”, “Babək”, “Gün keçdi”, “Nəsimi”, “Dədə Qorqud” və “Asif, Vasif, Ağasif“ filmləri bu gün də filmotekamızın qızıl fondunu bəzəməkdədir.
Sonda kinorejissorun uşaqlar üçün çəkdiyi “Asif, Vasif, Ağasif” filmi nümayiş etdirilmişdir.
Bölmənin digər xəbərləri
