Koreyada Dövlət Miqrasiya Xidmətinin işçiləri üçün təlim təşkil olunacaq
Bakı, 8 may, AZƏRTAC
Mayın 10-dan 30-dək Koreyada təşkil olunacaq “Miqrasiya Xidmətinin İdarə edilməsi üzrə Potensialın artırılması” başlıqlı KOICA (Koreya Beynəlxalq Əməkdaşlıq Agentliyi) təlim proqramında ölkəmizi təmsil edəcək Dövlət Miqrasiya Xidmətinin dörd əməkdaşı üçün mayın 8-də KOICA Azərbaycan ofisində tanışlıq görüşü və təqdimat keçirilib.
KOICA-dan AZƏRTAC-a bildiriblər ki, təlim proqramı Koreyanın məlumat miqrasiya idarəetmə sistemi və Koreyanın Miqrasiya Aktı, həmçinin problemlərin həlli üçün müvafiq tədbirlərin hazırlanması və daha effektiv miqrasiya xidməti idarəetmə sisteminin qurulmasına dair iştirakçıların bu sahədə biliklərinin artırılmasına yardımçı olacaq. Beş ölkədən 16 iştirakçının qatılacağı təlimi icra edəcək qurum Koreya Respublikasının Ədliyyə İnstitutudur.
Təqdimat mərasimində Koreya Beynəlxalq Əməkdaşlıq Agentliyinin Azərbaycan nümayəndəliyinin ölkə üzrə direktoru xanım Park Kumok belə təlim proqramlarının insan resurslarının inkişaf etdirilməsində mühüm rol oynadığını vurğulayıb və iştirakçılara uğurlar arzulayıb. O qeyd edib ki, KOICA məzunları illik seminar və xeyriyyə tədbirləri kimi bir çox tədbirlər həyata keçirib. Xanım Park Kumok iştirakçıları KOICA-ın fəal üzvləri sırasına qatılmağa və iki ölkə arasında əməkdaşlığın genişləndirilməsində mühüm rol oynamağa dəvət edib.
KOICA inkişaf etməkdə olan ölkələr üçün qrant və əməkdaşlıq proqramları həyata keçirən 1991-ci ildə Koreya Respublikasının Xarici İşlər Nazirliyi tabeliyində yaradılmış dövlət agentliyidir. KOICA 1994-cü ildən başlayaraq azərbaycanlı dövlət qulluqçularının müxtəlif təlim və təqaüd proqramlarında iştirakını təmin edir. Bu günədək KOICA məzunlarının sayı 635 nəfərdən çoxdur.
Bölmənin digər xəbərləri
