SİYASƏT
Latviya səfiri: Sivil dünyada bir dövlətin digər dövlətə qarşı ərazi iddiası qaldırması yolverilməzdir - MÜSAHİBƏ
![Latviya səfiri: Sivil dünyada bir dövlətin digər dövlətə qarşı ərazi iddiası qaldırması yolverilməzdir - MÜSAHİBƏ](/files/2023/3/1200x630/17003142321172227222_1200x630.jpg)
Bakı, 18 noyabr, Səadət Hakıyeva, AZƏRTAC
Latviya Respublikasının Azərbaycan Respublikasındakı fövqəladə və səlahiyyətli səfiri Edqars Skuya iki ölkə arasındakı əlaqələr, Qarabağda və Şərqi Zəngəzurda aparılan bərpa və yenidənqurma işlərində Latviya şirkətlərinin iştirakı və digər məsələlərlə bağlı AZƏRTAC-a eksklüziv müsahibə verib. Müsahibəni təqdim edirik.
-Cənab səfir, Azərbaycan ilə Latviya arasında əlaqələr tarixi və strateji xarakter daşıyır. Ölkələrimiz arasında münasibətlərin bugünkü vəziyyəti və perspektivləri barədə nə deyə bilərsiniz?
- Dövlətçiliklərinin bir əsrdən çox yaşı olan Latviya və Azərbaycan tarixən bir-birinə çox bağlıdır, ölkələrimizi dərin köklərə malik əlaqələr birləşdirir. Ölkələrimiz arasında siyasi dialoq mövcuddur, biz hökumət və parlamentlər səviyyəsində sıx əməkdaşlıq edirik. Mədəniyyət, biznes sahələrində əlaqələrimizin perspektivləri genişdir.
Latviyanın Azərbaycandakı səfiri kimi bu ölkədə fəaliyyətimə yeni başlamışam. Ölkələrimiz arasında siyasi dialoqun davam etdirilməsi və bütün sahələr üzrə genişləndirilməsi məqsədlərimizdən biridir. Münasibətlərimizdə üç əsas istiqamət çox mühümdür. Bunlardan birincisi, siyasi müstəvidə olan əlaqələrdir.
2017-ci il iyulun 17-də Riqa şəhərində Azərbaycan ilə Latviya arasında strateji tərəfdaşlığın yaradılması haqqında imzalanmış Birgə Bəyannamə əlaqələrimizin yol xəritəsini müəyyənləşdirir. Dostluğa, qarşılıqlı hörmətə və etimada əsaslanan bu sənəd siyasi dialoq, iqtisadi əməkdaşlıq, energetika, təhlükəsizlik, sərmayə, beynəlxalq əməkdaşlıq, həmçinin elm və mədəniyyət sahələrində əməkdaşlığın genişləndirilməsini özündə ehtiva edir.
İkinci mühüm məqam ondan ibarətdir ki, ölkələrimizin iqtisadiyyat və biznes sahəsində əməkdaşlıq əlaqələrinin perspektivləri böyükdür. Qarşılıqlı idxalı, sərmayə yatırılmasını genişləndirməyə ehtiyac var. Düşünürəm ki, Latviya Azərbaycanı yüksək texnologiya avadanlıqları ilə təmin etmək imkanına malikdir. Məsələn, bizim yaşıl enerji, informasiya texnologiyaları, kompüter sahələrində böyük təcrübəmiz var. Bu istiqamətdə əməkdaşlıq əlaqələrinin dərinləşdirilməsi yaxşı olardı.
Digər, üçüncü məsələ mədəniyyət sahəsindəki əməkdaşlıqla bağlıdır. Latviyanın Azərbaycanda, Azərbaycanın isə Latviyada nümayiş və təbliğ etməli bir çox nümunəsi var. Ölkələrimiz kifayət qədər zəngin mədəni irsə malikdir. Biz müştərək layihələr üzərində işləyirik.
-Latviya Azərbaycanın Qarabağda və Şərqi Zəngəzurda apardığı bərpa və quruculuq işlərində iştirak etməyi planlaşdırırmı?
-Azərbaycanın azad edilmiş ərazilərinin minalardan və partlamamış sursatlardan təmizlənməsi prosesində latviyalı mütəxəssislər də iştirak edirlər. Latviyanın bu sahədə çox olmasa da, müəyyən təcrübəsi var. Ərazilərin minalardan təmizlənməsi çox mürəkkəb və uzunmüddətli prosesdir. Həmin ərazilərdə bərpa və quruculuq işlərinə Latviyanın iştirakı ilə hələlik konkret nəsə deyə bilmərəm. Bu, çox güman hadisələrin gedişindən asılı olacaq. Əgər belə təklif olarsa, düşünürəm ki, bizim biznes sahəsi üzrə fəaliyyət göstərən təşkilatları maraqlandıra bilər.
-Azərbaycan 44 günlük Vətən müharibəsi ilə öz ərazi bütövlüyünü tam bərpa edib. Ölkəmiz Cənubi Qafqaz regionunda sülhün, dinc yanaşı yaşamanın təmin olunması istiqamətində ciddi səylər göstərir. Ermənistan da daxil olmaqla, bu, bəzi qüvvələrin marağında deyil. Bununla bağlı fikirlərinizi öyrənmək istərdik.
-Latviya Avropa İttifaqının üzvü kimi Azərbaycanla Ermənistan arasında münasibətlərin normallaşması, Cənubi Qafqazda sülhün təmin olunmasında maraqlıdır. İlk növbədə, iki ölkə arasında münasibətlərin normallaşdırılması, siyasi dialoqun davam etdirilməsi çox vacibdir. Sivil dünyada bir dövlətin digər dövlətə qarşı ərazi iddiası qaldırması, ərazisinə soxulması, münaqişə yaratması yolverilməzdir.
Azərbaycan sülh sazişinin imzalanması üçün beş baza prinsipini təklif edib və qarşı tərəfin cavabını gözləyir.
Latviya Azərbaycanın beynəlxalq səviyyədə tanınan sərhədlərini tanıyır və hörmət edir. Bizim mövqeyimiz əvvəldən belə olub, indi də belədir.
Normallaşma istiqamətində istənilən addım, irəliləyiş təqdirəlayiqdir. Addım-addım bu prosesə doğru gedilir. Sülh sazişinin imzalanması hər iki ölkənin xeyrinə olacaq. Bu, Avropa İttifaqının da marağındadır.