Bakı, 29 iyun, AZƏRTAC

Azərbaycan Səhiyyə Nazirliyində Avropa Kardioloqlar Cəmiyyətinin (ESC) prezidenti, İsveçrənin Sürix Universitetinin Molekulyar Kardiologiya Mərkəzinin direktoru Tomas F.Lüşerlə görüş keçirilib.

Nazirliyin mətbuat xidmətindən AZƏRTAC-a verilən məlumata görə, səhiyyə naziri Teymur Musayev ölkəmizdə kardiologiyanın inkişaf tarixindən danışıb. Nazir vurğulayıb ki, Ümummilli Lider Heydər Əliyevin müdrik siyasəti və uzaqgörənliyi sayəsində tibbin bütün sahələrində, o cümlədən kardiologiyada mühüm nəticələrin əldə olunmasının əsası qoyulub: “Prezident İlham Əliyevin rəhbərliyi altında Azərbaycan səhiyyəsinin müasir infrastrukturu qurulub. Bir sıra dövlət proqramlarının reallaşdırılmasında Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın böyük xidmətləri var”.

T.Musayev çıxışında ürək-damar xəstəlikləri ilə qlobal mübarizənin təşviqi üçün vacib olan kardiologiyanın bütün spektrlərini əhatə edən ESC-nin fəaliyyətini yüksək qiymətləndirib. Nazir Avropa Kardioloqlar Cəmiyyətinin ürək-damar mütəxəssislərinin peşəkarlığını da qeyd edib: “Bu unikal şəbəkə bizə ürək-damar xəstəliklərinin təsirinin azaldılması istiqamətində geniş imkanlar yaradır”.

ESC prezidenti belə görüşlərin təcrübə və bilik mübadiləsi baxımından çox vacib olduğunu vurğulayıb. Tomas F.Lüşer Avropa Kardioloqlar Cəmiyyətinin fəaliyyəti haqqında da ətraflı məlumat verib. Onun sözlərinə görə, ESC Avropanın 57, o cümlədən Azərbaycanın milli kardioloji cəmiyyətini özündə birləşdirir.

Bakıda keçirilən III Ürək Çatışmazlığı Yeniliklər konqresinin əhəmiyyətini vurğulayan Tomas F.Lüşer qeyd edib ki, Azərbaycanda səhiyyənin müxtəlif sahələrinin, o cümlədən kardiologiyanın aktual problemlərinə həsr olunan beynəlxalq konqreslər hər zaman yüksək səviyyədə təşkil olunub.

Görüşdə Avropa Kardioloqlar Cəmiyyətinin Azərbaycan Səhiyyə Nazirliyi ilə kardiologiya sahəsində əməkdaşlığın genişləndirilməsi barədə faydalı müzakirələr aparılıb.

Qeyd edək ki, dünyanın ən çox istinad edilən alimlərindən biri olan professor Tomas F.Lüşer ürək-damar təbabətinə dair 500-dən çox elmi məqalə, 200-dən çox resenziya və kitab fəsillərinin müəllifidir.