ELM VƏ TƏHSİL
Lerikdə Beynəlxalq Müəllimlər Günü qeyd edilmişdir
![Lerikdə Beynəlxalq Müəllimlər Günü qeyd edilmişdir](/files/2013/3/1200x630/14071450021135364530_1200x630.jpg)
Lerik, 5 oktyabr (AərTAc). Lerik şəhərindəki 1 nömrəli texniki fənlər təmayüllü liseydə 5 oktyabr - Beynəlxalq Müəllimlər Gününə həsr olunmuş tədbir keçirilmişdir.
AZƏRTAC xəbər verir ki, mərasim iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad etmişlər.
Toplantıda çıxış edən Lerik Rayon Təhsil Şöbəsinin müdiri Balaşirin Nəsirov, rayon icra hakimiyyətinin başçısı Rövşən Bağırov və başqaları əlamətdar gün münasibətilə müəllimləri təbrik etmiş, ölkəmizdə təhsilin inkişafına göstərilən qayğıya və müəllim əməyinə verilən yüksək qiymətə görə Azərbaycan dövlətinə minnətdarlıqlarını bildirmişlər.
Son illər rayonda 40-a yaxın yeni məktəb binası tikilmiş, 23 təhsil ocağı əsaslı təmir edilmişdir. Məktəblər ən müasir avadanlıq və ləvazimatlarla, kompyuterlərlə təchiz edilmişdir.
Sevindirici haldır ki, Beynəlxalq Müəllimlər Günü münasibətilə oktyabrın 3-də Lerik şəhər 1 nömrəli texniki fənlər təmayüllü liseyinin müəllimi Dünyaxanım Kərimova “Tərəqqi” medalı ilə təltif edilmişdir.
Toplantıda təhsil sahəsində fərqlənən müəllimlərin bir qrupuna rayon icra hakimiyyətinin və təhsil şöbəsinin fəxri fərmanları, qiymətli hədiyyələr təqdim edilmişdir.