Media: Britaniya, Almaniya və Fransanın xarici işlər nazirləri London görüşündə iştirak etməyəcəklər
Bakı, 23 aprel, AZƏRTAC
Böyük Britaniya, Almaniya və Fransanın xarici işlər nazirləri ABŞ-ın qərarı səbəbindən London görüşündə iştirakdan imtina ediblər.
AZƏRTAC xəbər verir ki, “Sky News” telekanalının məlumatına görə, ABŞ Dövlət katibi Marko Rubio və Donald Trampın xüsusi elçisi Stiven Uitkoffun Böyük Britaniyaya səfərinin ləğvindən sonra Fransa və Almaniyanın xarici işlər nazirləri də analoji addımlar atıblar.
Bu gün Londonda Böyük Britaniya, ABŞ, Fransa, Almaniya və Ukraynanın yüksəkvəzifəli rəsmiləri arasında danışıqlar planlaşdırılıb. Həmçinin burada Ukraynanın xarici işlər naziri Andriy Sibiqa britaniyalı həmkarı Devid Lemmi ilə ikitərəfli görüş keçirəcək.
London görüşündə təqdim edilməsi planlaşdırılan Ukrayna böhranının həlli ilə bağlı Vaşinqtonun əsas təkliflərindən biri Kiyevin Krım yarımadasını Rusiya ərazisi kimi tanımasıdır. Ukraynanın dövlət başçısı Volodimir Zelenski bu variantı qəbul etmədiyini söylədikdən sonra Dövlət katibi Marko Rubio və Stiven Uitkoffun Böyük Britaniyaya səfərləri ləğv olunub. ABŞ Dövlət Departamenti Londonda Birləşmiş Ştatları yalnız Donald Trampın xüsusi nümayəndəsi Keyt Kelloqun təmsil edəcəyini bildirib.
Bölmənin digər xəbərləri
