BMU məzunu “Chevening” təqaüd proqramının qalibi olub
Bakı, 6 avqust, AZƏRTAC
Bakı Mühəndislik Universitetinin (BMU) dünya iqtisadiyyatı ixtisası üzrə bakalavr məzunu İlqar Həşimov Böyük Britaniya hökumətinin “Chevening” təqaüd proqramının qalibi olub.
Bu barədə AZƏRTAC-a BMU-dan məlumat verilib. Bildirilib ki, BMU məzunu 2026/2027-ci tədris ilindən etibarən Böyük Britaniyanın aparıcı ali təhsil müəssisələrindən biri olan Vorvik Universitetində maliyyə iqtisadiyyatı ixtisası üzrə magistr təhsili alacaq. Təhsil haqqı, aylıq təqaüd və digər xərclər daxil olmaqla, təqaüdün ümumi dəyəri 51 min 920 funt sterlinqdən (təxminən 120 min manat) artıqdır.
Qeyd olunub ki, cari il “Chevening” təqaüd proqramına dünyanın müxtəlif ölkələrindən 109 mindən çox namizəd müraciət edib. Seçim mərhələlərinin yekununda yalnız 700 nəfər təqaüdə layiq görülüb. Azərbaycandan isə cəmi 3 namizəd bu nüfuzlu proqramın qalibi olub.
İlqar Həşimov müxtəlif illərdə “KPMG Azerbaijan”, “PASHA Bank” və “Azərbaycan Dəmir Yolları” QSC-də maliyyə və hesabatlılıq sahəsində müxtəlif vəzifələrdə çalışıb. Hazırda o, “AzerGold” QSC-də Hesabatlılıq şöbəsinin müdiri vəzifəsində fəaliyyət göstərir.
“Chevening” Böyük Britaniya hökumətinin qlobal təqaüd proqramıdır. Proqram akademik nailiyyətləri, peşəkar təcrübəsi və liderlik potensialı ilə seçilən gənc mütəxəssislərə Böyük Britaniyanın aparıcı universitetlərində magistratura təhsili almaq imkanı yaradır.
Bölmənin digər xəbərləri
