Ulu Öndərin dövlət idarəçiliyi konsepsiyasında hüquqi dövlət quruculuğu mühüm yer tuturdu ŞƏRH
Bakı, 3 oktyabr, AZƏRTAC
1993-cü il oktyabrın 3-də Ulu Öndər Heydər Əliyev Azərbaycanın Prezidenti seçildi. Bu hadisə ölkənin son dərəcə mürəkkəb ictimai-siyasi vəziyyət yaşadığı bir dövrə təsadüf edirdi. Müstəqilliyin ilk illərində Azərbaycanda siyasi və iqtisadi böhran dərinləşmiş, dövlət idarəçiliyində ciddi problemlər yaranmışdı. Ölkədə siyasi qarşıdurma, qeyri-sabitlik və silahlı qruplaşmaların fəaliyyəti dövlətçiliyə ciddi təhlükə yaradırdı. Qarşıdurmanın vətəndaş müharibəsinə çevrilməsi ehtimalı getdikcə artırdı. Belə bir şəraitdə Heydər Əliyevin siyasi hakimiyyətə qayıdışı ölkənin gələcək inkişaf istiqamətinin müəyyənləşdirilməsində mühüm rol oynadı.
Bu sözləri AZƏRTAC-a açıqlamasında Bakı Dövlət Universitetinin kafedra müdiri, professor Kamilə Əliyeva deyib.
O bildirib ki, 1993-cü il iyunun 9-da Ulu Öndər Heydər Əliyevin Bakıya gəlməsi, ardınca Gəncəyə gedərək yaranmış böhranlı vəziyyətin aradan qaldırılmasında iştirak etməsi həmin dövrün ən mühüm siyasi hadisələrindən idi. Bu addım ölkədə sabitliyin bərqərar olunmasına və dövlət idarəçiliyinin yenidən qurulmasına yönəlmiş prosesin başlanğıcı oldu. Ümummilli Lider Heydər Əliyevin Prezident seçilməsindən sonra qarşıya qoyulan əsas vəzifələrdən biri dövlətçiliyin möhkəmləndirilməsi idi. Qanunun aliliyinin təmin edilməsi, qeyri-qanuni silahlı dəstələrin zərərsizləşdirilməsi, ordu quruculuğunun gücləndirilməsi və ictimai-siyasi sabitliyin yaradılması istiqamətində mühüm addımlar atıldı. Bununla da Azərbaycan vətəndaş müharibəsi təhlükəsindən uzaqlaşaraq dövlət institutlarının möhkəmləndirilməsi mərhələsinə qədəm qoydu.
Kamilə Əliyeva qeyd edib ki, Ulu Öndər Heydər Əliyevin siyasi fəaliyyətinin əsas istiqamətlərindən biri Azərbaycanın beynəlxalq mövqelərinin gücləndirilməsi idi. Onun rəhbərliyi dövründə Azərbaycan xarici siyasətdə çoxvektorlu və milli maraqlara əsaslanan siyasət həyata keçirməyə çalışdı. 1994-cü ildə imzalanan “Əsrin müqaviləsi” ölkənin enerji strategiyasının formalaşmasında mühüm mərhələ oldu. Sonrakı illərdə Bakı-Tbilisi-Ceyhan neft və Bakı-Tbilisi-Ərzurum qaz kəmərlərinin reallaşdırılması Azərbaycanın regional və beynəlxalq enerji layihələrində rolunu artırdı. Bu siyasətin digər mühüm istiqaməti Ermənistan-Azərbaycan münaqişəsi ilə bağlı ölkəmizin mövqeyinin beynəlxalq təşkilatların gündəliyində saxlanılması idi. Ümummilli Lider Heydər Əliyevin prezidentliyi dövründə Azərbaycanın ərazi bütövlüyü məsələsi ölkənin xarici siyasətinin əsas prioritetlərindən birinə çevrildi.
“Ulu Öndər Heydər Əliyevin dövlət idarəçiliyi konsepsiyasında hüquqi dövlət quruculuğu, qanunun aliliyi, milli-mənəvi dəyərlərin qorunması və vətəndaş cəmiyyətinin inkişafı da mühüm yer tuturdu. 1995-ci ildə Azərbaycan Konstitusiyasının qəbul edilməsi bu istiqamətdə mühüm hüquqi əsas yaratdı. Eyni zamanda, qadınların ictimai-siyasi həyatda fəal iştirakına və onların hüquqlarının qorunmasına diqqət göstərilməsi də dövlət siyasətinin istiqamətlərindən biri idi. Heydər Əliyevin siyasi irsi bu gün də Azərbaycanın ictimai-siyasi həyatında müzakirə olunan əsas mövzulardandır. Onun dövlətçilik konsepsiyasının başlıca elementləri, – müstəqilliyin qorunması, güclü dövlət institutlarının yaradılması, milli maraqların müdafiəsi və Azərbaycanın beynəlxalq mövqelərinin möhkəmləndirilməsi, – sonrakı dövrdə də dövlət siyasətində öz əksini tapdı.
Bu baxımdan Prezident İlham Əliyevin hakimiyyəti dövründə həyata keçirilən enerji, nəqliyyat, regional və beynəlxalq siyasət layihələrinin bir hissəsi Heydər Əliyevin müəyyən etdiyi siyasi və strateji xəttin davamı kimi təqdim olunur”, - deyə o vurğulayıb.
Kafedra müdirinin sözlərinə görə, 1993-cü il oktyabrın 3-ü hadisələrinə tarixi baxımdan yanaşdıqda, bunu Azərbaycanın müstəqilliyinin ilk illərində dövlətçiliyin taleyinin müəyyənləşdiyi mürəkkəb mərhələnin mühüm dönüş nöqtələrindən biri kimi qiymətləndirmək mümkündür. Həmin dövrdə qəbul edilən siyasi qərarlar sonrakı illərdə Azərbaycanın dövlət idarəçiliyinə, xarici siyasətinə və sosial-iqtisadi inkişafına təsir göstərən proseslərin əsasını formalaşdırdı.
Bölmənin digər xəbərləri
