SİYASƏT
MİLLİ MƏCLİS BƏZİ QANUNLARA ƏLAVƏLƏR VƏ DƏYİŞİKLİKLƏR ETMİŞDİR
Bakı, 12 fevral (AZƏRTAC). Fevralın 12-də Milli Məclisin növbəti iclası keçirilmişdir. Əvvəlcə cari məsələlərə baxılmış, Milli Məclisin sədri Oqtay Əsədov deputatların qaldırdıqları məsələlərə, söylədikləri fikirlərə münasibət bildirmişdir.
Sonra gündəlikdəki qanun layihələrinin müzakirəsinə başlanmışdır. Deputatlar Azərbaycan Respublikasının Mülki Məcəlləsinə, “Əcnəbilərin və vətəndaşlığı olmayan şəxslərin hüquqi vəziyyəti haqqında”, “Qeyri-hökumət təşkilatları (ictimai birliklər və fondlar) haqqında”, “Hüquqi şəxslərin dövlət qeydiyyatı və dövlət reyestri haqqında”, “Mühasibat uçotu haqqında” qanunlara təklif olunan əlavə və dəyişikliklərə münasibət bildirmişlər. Qeyd olunmuşdur ki, bu dəyişikliklər vətəndaşların hüquq məsuliyyətini artırmaqla yanaşı, Azərbaycan qanunvericiliyinin daha da təkmilləşdirilməsinə və beynəlxalq hüququn norma və prinsiplərinə uyğunlaşdırılmasına xidmət edir.
Sonra “Məlumat azadlığı haqqında”, “Əməliyyat-axtarış fəaliyyəti haqqında”, “Kütləvi informasiya vasitələri haqqında”, “Kəşfiyyat və əks- kəşfiyyat fəaliyyəti haqqında” və “İnformasiya əldə etmək haqqında” Qanunlara təklif olunan əlavələr və dəyişikliklər müzakirə olunmuşdur.
Milli Məclisin insan hüquqları komitəsinin sədri Rəbiyyət Aslanova qanunlara təklif olunan əlavə və dəyişikliklərin mahiyyəti barədə məlumat verərək bildirmişdir ki, bu qanunlara edilən dəyişikliklər vətəndaşların hüquqlarının müdafiəsinin gücləndirilməsinə xidmət edir.
Dəyişikliklərdə deyilir ki, əməliyyat-axtarış tədbirləri keçirilən hallar istisna olmaqla, digər hallarda şəxsin onun xəbəri olmadan və ya etirazına baxmayaraq, kütləvi informasiya vasitələrinin nümayəndələri və digər şəxslər tərəfindən izlənilməsi, video və foto çəkilişinə, səs yazısına və digər bu cür hərəkətlərə məruz qalması qanunvericiliklə müəyyən edilmiş məsuliyyətə səbəb olur.
Müzakirələr zamanı Milli Məclis sədrinin birinci müavini Ziyafət Əsgərov Konstitusiyada, eləcə də beynəlxalq sənədlərdə bu hüququn necə əhatə olunduğu barədə məlumat vermişdir. Bildirilmişdir ki, Konstitusiyanın 32-ci maddəsində bu məsələ, yəni şəxsi toxunulmazlıq hüququ öz əksini aydın şəkildə tapmışdır və təklif olunan əlavə də məhz Konstitusiyadan irəli gəlir. Yəni bu məsələ insanların ictimai fəaliyyətinə deyil, onların ailə və şəxsi həyatına müdaxilənin qarşısını alacaqdır.
Axşam iclasında deputatların fikirləri dinlənildikdən sonra sənəd səsə qoyularaq qəbul olunmuşdur.
Sonra deputatlar “Vətəndaşların müraciətlərinə baxılması qaydası haqqında”, “Bələdiyyələrin statusu haqqında”, “Hesablama Palatası haqqında”, “Bələdiyyələrin maliyyəsinin əsasları haqqında”, “Dövlət satınalmaları haqqında”, “Azərbaycan Respublikasının Korrupsiyaya qarşı mübarizə üzrə Komissiyası haqqında Əsasnamənin təsdiq edilməsi barədə”, “Azərbaycan Respublikasının orden və medallarının təsis edilməsi haqqında” qanunlara və Azərbaycan Respublikasının Cinayət-Prosessual Məcəlləsinə təklif olunan əlavə və dəyişiklikləri də təsdiq etmişlər. Bildirilmişdir ki, bu əlavələr və dəyişikliklər ölkə qanunvericiliyinin təkmilləşdirilməsi və beynəlxalq hüquq normalarına uyğunlaşdırılması baxımından çox əhəmiyyətlidir.
İclasda “Fərdi məlumatlar haqqında” qanun layihəsi də ikinci oxunuşda müzakirə edilmişdir. İnsan hüquqları komitəsinin sədri Rəbiyyət Aslanova bildirmişdir ki, qanunun əsas məqsədi fərdi məlumatların toplanması, işlənməsi və mühafizəsinin qanunvericilik əsaslarını, ümumi prinsiplərini, dövlət tənzimlənməsinin qayda və tələblərini, fərdi məlumatların informasiya ehtiyatlarında formalaşdırılması, informasiya sistemlərinin yaradılması, informasiyanın verilməsi və ötürülməsi qaydalarını, bu prosesdə iştirak edən şəxslərin hüquqlarının, vəzifələrinin və məsuliyyətinin əsaslarını müəyyənləşdirmək, habelə hüquq və azadlıqların, o cümlədən şəxsi və ailə sirrinin toxunulmazlıq hüququnun müdafiəsini təşkil etməkdir.
Sənədin birinci oxunuşda müzakirəsi zamanı səslənmiş rəy və təkliflərin əksəriyyəti nəzərə alınmışdır. Qanun layihəsi hazırlanarkən beynəlxalq hüququn norma və prinsipləri də nəzərə alınmışdır. Layihə səs çoxluğu ilə ikinci oxunuşda qəbul olunmuşdur.
Günün sonunda “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” qanun layihəsi də ikinci oxunuşda müzakirə olunmuşdur. Məlumat verilmişdir ki, bu qanun ölkə vətəndaşlarının istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortası sahəsində münasibətləri tənzimləyəcək, onların hüquqi, iqtisadi və təşkilati əsaslarını müəyyən edəcəkdir. Qeyd olunmuşdur ki, layihənin birinci oxunuşda müzakirəsindən sonra deputatların qeyd və təklifləri nəzərə alınmış və sənəd daha da təkmilləşdirilmişdir.
Müzakirələrdən sonra hər iki qanun layihəsi ikinci oxunuşda səsə qoyularaq qəbul edilmişdir.
Bununla da Milli Məclisin iclası başa çatmışdır.