REGİONLAR
Naxçıvanla tanışlıq Acarıstan Muxtar Respublikasının nümayəndə heyətində xoş təəssüratlar yaradıb
Naxçıvan, 2 fevral, Rauf Əliyev, AZƏRTAC
Naxçıvan Muxtar Respublikasında səfərdə olan Acarıstan Muxtar Respublikası Hökumətinin sədri Zurab Pataradze və nümayəndə heyəti Naxçıvanla tanış olub.
AZƏRTAC xəbər verir ki, qonaqlar əvvəlcə ümummilli lider Heydər Əliyevin Naxçıvan şəhərinin baş meydanında əzəmətlə ucalan abidəsini ziyarət edib, önünə gül dəstələri qoyulub.
Sonra Heydər Əliyev Muzeyi ilə tanışlıq olub. Burada qonaqlara məlumat verilib ki, muzeyin fondunda ümummilli lider Heydər Əliyevin həyat və fəaliyyətini özündə əks etdirən 4 min 600-dən çox eksponat toplanıb. Ulu Öndər tərəfindən qəbul edilən qərar və sərəncamlar, imzalanan protokol və müqavilələr, Ümummilli Liderə göndərilmiş məktub və teleqramlar görkəmli dövlət xadiminin mənalı ömür yolunun müxtəlif anlarını özündə əks etdirməklə, Heydər Əliyevin zəngin dövlətçilik və ictimai-siyasi fəaliyyəti barədə də dolğun təsəvvür yaradır.
Zurab Pataradze muzeyin xatirə kitabına ürək sözlərini yazıb.
Nümayəndə heyəti Duzdağ Fizioterapiya Mərkəzində də olub. Məlumat verilib ki, 300 yerlik mərkəzdə bronxial astma və ağciyər bronx sisteminin digər qeyri-spesifik xəstəliklərindən əziyyət çəkən insanlar müalicə edilir. Mərkəzə dünyanın bir çox ölkələrindən müraciətlər olur. Naxçıvan Muxtar Respublikası ilə Acarıstan Muxtar Respublikası arasında səhiyyə sahəsində həyata keçirilən tədbirlər çərçivəsində tənəffüs yolu xəstəliklərindən əziyyət çəkən acarıstanlı uşaqların Duzdağ Fizioterapiya Mərkəzində müalicəsi təşkil olunur.
Naxçıvan Dövlət Universiteti ilə tanışlıq zamanı qeyd edilib ki, 1967-ci ildə yaradılan və 50 ildir fəaliyyət göstərən ali təhsil ocağında bu gün müasir tədris korpusları, idman kompleksi, tələbə yataqxanası, konservatoriya, elektron kitabxana, media mərkəzi, xəstəxana, tələbə sosial məişət kompleksi, bir sözlə, zəngin maddi-texniki bazaya malik universitet şəhərciyi tələbələrin istifadəsinə verilib. Hazırda universitetdə 12 fakültə fəaliyyət göstərir, 57 bakalavr və 41 magistr ixtisası üzrə kadr hazırlanır, 6 minə yaxın tələbə təhsil alır.
Naxçıvan Dövlət Universitetinin dünyanın 80 aparıcı ali təhsil müəssisəsi, eləcə də Batumi Dövlət Universiteti ilə əlaqələri var. 2012-ci ildə hər iki universitet arasında əməkdaşlıq müqaviləsi imzalanıb, qarşılıqlı tələbə mübadiləsinə başlanılıb. Ötən dövrdə hər iki universitetdən 12 tələbə olmaqla, ümumilikdə, 24 tələbə mübadilə əsasında Naxçıvan Dövlət Universitetində və Batumi Dövlət Universitetində təhsil alıb.
Universitet ilə tanışlıq çərçivəsində Acarıstan Muxtar Respublikası Hökumətinin sədri ali təhsil ocağının rəhbərliyi ilə görüşündə qarşılıqlı təhsil əlaqələrinin daha da inkişaf etdirilməsinin əhəmiyyətindən danışıb.
Acarıstan nümayəndə heyəti səfər çərçivəsində Naxçıvan Dövlət Musiqili Dram Teatrında da olub. Qonaqlar teatrın tamaşa salonunda Naxçıvan Dövlət Filarmoniyasının Kamera Orkestrinin ifasında konsert proqramına tamaşa ediblər.
Acarıstan Muxtar Respublikasının nümayəndə heyəti Naxçıvan Biznes Mərkəzində muxtar respublikada istehsal olunan müxtəlif növ ərzaq və sənaye məhsullarının, əl işlərinin və rəsm əsərlərinin sərgisinə baxıblar.
Qonaqlara mərkəzin fəaliyyəti və muxtar respublikanın sosial-iqtisadi inkişaf göstəriciləri barədə məlumat verilib. Qeyd olunub ki, sərgi salonunda 97 müəssisənin 136 növdə və 916 çeşiddə məhsulu, müxtəlif sənətkarlar tərəfindən hazırlanan əl işləri və rəsm əsərləri nümayiş olunur. Muxtar respublikada 365 növdə məhsul istehsal olunur, əhalinin 343 növdə məhsula olan tələbatı tamamilə yerli istehsal hesabına ödənilir. Görülən işlər ixracın həcminin artmasına da öz təsirini göstərib. Bu gün muxtar respublikada istehsal olunan məhsullar dünyanın bir çox ölkələri ilə yanaşı, Gürcüstana və onun Acarıstan Muxtar Respublikasına da ixrac edilir.