NEFTÇİLƏRİN MƏNZİLƏ OLAN TƏLƏBATI 2010-CU İLİN SONUNADƏK TAM ÖDƏNİLƏCƏKDİR
AZƏRTAC xəbər verir ki, 2008-2009-cu illərdə Bakının müxtəlif yerlərində neftçilər üçün 1500-dək mənzili olan binalar istifadəyə veriləcəkdir.
Neft və Qaz Sənayesi İşçiləri Həmkarlar İttifaqı Respublika Komitəsinin sədri Cahangir Əliyev bildirmişdir ki, 3 il ərzində neftçilərin mənzil problemi tam həllini tapacaqdır. “Dövlət Neft Şirkətinin idarə və müəssisələrində çalışan işçilərin sosial rifahının yaxşılaşdırılması haqqında 2007-2010-cu illər üçün Sosial İnkişaf Proqramı”nda bu, ayrıca bənd kimi qeyd edilmişdir. İndi həmin Proqram uğurla yerinə yetirilir. Qarşıdakı 2-3 ildə ARDNŞ mənzil və digər sosial obyektlərin tikintisinə 300 milyon manat vəsait sərf edəcəkdir. Təkcə bu rəqəm sosialyönümlü tikinti işlərinin miqyasını aydın göstərir. Hazırda Əhmədli, Qaraçuxur, Padamdar, Sahil, 8-ci kilometr qəsəbələrində, habelə paytaxtın digər yerlərində bir-birindən yaraşıqlı, hər cür rahatlığı olan binalar inşa edilir. Tikinti işlərini Dövlət Neft Şirkətinin Sosial İnkişaf İdarəsi icra edir. İnşaat işlərinin gedişi barədə şirkətin müvafiq qurumlarına vaxtaşırı məlumat verilir.
Bölmənin digər xəbərləri
