OĞUZDA YAŞAYAN YƏHUDİLƏR DİNİ BAYRAMLARINI QEYD ETMİŞLƏR
AZƏRTAC-ın müxbiri xəbər verir ki, Oğuz şəhərindəki sinaqoqlardan birində yəhudilərin “Pesax” dini bayramı münasibətilə mərasim keçirilmişdir. Mərasimdə rayon rəhbərliyi, dindarlar, ictimaiyyətin nümayəndələri iştirak etmişlər.
Yəhudi icmasının üzvü İssaq Abramov ənənəvi “Pesax” dini bayramının tarixi barədə məlumat vermişdir.
Yəhudi xalqını əlamətdar bayram münasibətilə təbrik edən rayon icra hakimiyyətinin başçısı Aydın Əlihüseynov Azərbaycanın hər yerində olduğu kimi, Oğuzda da azsaylı xalqların adət-ənənələrinin, milli mədəniyyətlərinin qorunub saxlanmasına daim diqqət və qayğı göstərildiyini bildirmiş, burada yaşayan yəhudilərin rayonun tamhüquqlu sakinləri olduğunu xüsusi vurğulamışdır. Bildirilmişdir ki, hazırda rayonda 35 ailə olmaqla, 170 nəfərə yaxın yəhudi yaşayır. Rayon mərkəzində 2 sinaqoq fəaliyyət göstərir. Onların hər ikisi tarixi abidə kimi dövlət qeydiyyatına alınmış və əsaslı təmir olunmuşdur.
Azərbaycan və İsrail arasında dostluq əlaqələrinin daha da möhkəmlənməsində ümummilli liderimiz Heydər Əliyevin xidmətləri xüsusi vurğulanmış, bu əlaqələrin inkişaf etdirilməsində Prezident İlham Əliyevin məqsədyönlü fəaliyyəti diqqətə çatdırılmışdır.
Mərasim müqəddəslərin ruhuna duaların oxunması və bayram ayini ilə başa çatmışdır.
