Bakı, 2 noyabr, AZƏRTAC

Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən işçi qrupunun təşkilatçılığı və iştirakı ilə bu ilin oktyabr ayı ərzində aidiyyəti qurumlarla birgə bir sıra tədbirlər keçirilib.

Dövlət Komissiyasının daimi fəaliyyət göstərən işçi qrupundan AZƏRTAC-a bildiriblər ki, Yeni Azərbaycan Partiyası Mərkəzi Aparatının, işçi qrupunun və “Azərbaycan Televiziyası və Radio Verilişləri” Qapalı Səhmdar Cəmiyyətinin 2022-ci ilə dair imzalanmış birgə Tədbirlər Planına uyğun olaraq Bakı Slavyan Universitetində “Zərərli vərdişlərə qarşı sosial fəallıq” mövzusunda maarifləndirici tədbir təşkil olunub. Daha bir maarifləndirmə tədbiri Ədliyyə Nazirliyi Penitensiar Xidməti ilə Dövlət Komissiyasının işçi qrupu arasında təsdiq olunmuş Tədbirlər Planının icrası çərçivəsində narkomanlığın cəmiyyətə və insan sağlamlığına zərəri barədə Penitensiar Xidmətin 15 və 16 saylı cəzaçəkmə müəssisəsində məhkumlar arasında təbliğat işinin gücləndirilməsi məqsədilə aidiyyəti qurumların nümayəndələrinin iştirakı ilə baş tutub. Digəri isə valideyn himayəsindən məhrum olmuş sağlam uşaqlar üçün 2 və 11 nömrəli ümumi orta internat məktəblərində keçirilib.

Gəncə, Mingəçevir, Şəki, Göyçay, Ağdaş, Göygöl, Şəmkir, Zaqatala, Balakən, Qax, Qəbələ və İsmayıllıda fəaliyyət göstərən komissiya üzvləri ilə görüşlərin təşkili təbliğat və maarifləndirmə işlərinin daha da gücləndirilməsi, davamlılığının təmin edilməsi, həyata keçirilən tədbirlərin qiymətləndirilməsinin icra vəziyyətinin öyrənilməsi baxımından mühüm əhəmiyyət kəsb edir.

Ötən ay ərzində könüllülərin narkotik asılılıq probleminə dair biliklərinin və peşəkarlıq səviyyəsinin artırılması məqsədilə iştirakçılara narkotik maddələrdən istifadənin risk amilləri, psixoaktiv maddələrin xüsusiyyətləri və onların sağlamlığa zərərli təsiri, narkotik asılılığın formalaşma mərhələləri, antinarkotik təbliğatın vacibliyi, narkomanlığa qarşı mübarizə üsulları ilə bağlı keçirilən təlimlər də xüsusi önəm kəsb edib. Gənclər Fondu ilə imzalanmış tədbirlər planına müvafiq olaraq Gənclərin İnkişaf və Karyera Mərkəzinin Gəncə, Mingəçevir, Şəki, Göyçay, Ağdaş, Göygöl, Şəmkir, Zaqatala, Balakən, Qax, Qəbələ və İsmayıllı nümayəndəliklərində təlimlər olub. Bundan başqa, Dövlət Komissiyasının işçi qrupu və Ailə, Qadın və Uşaq Problemləri üzrə Dövlət Komitəsinin birgə təşkilatçılığı çərçivəsində komitənin əməkdaşları üçün təşkil edilən təlim, həmçinin “Gənclərin Anti-Narkomaniya” İctimai Birliyi ilə narkomanlığa qarşı mübarizə işinin təşkili üzrə daha bir təlim, Bakı Şəhəri üzrə Təhsil İdarəsi ilə birgə imzalanmış Tədbirlər Planının müvafiq bəndinin icra edilməsi məqsədilə Binəqədi, Xətai, Xəzər və Nəsimi rayonlarının ümumtəhsil məktəblərinin şagirdlərinə narkomanlıq probleminə dair seminarların təşkili də ötən ay keçirilən tədbirlər sırasındadır.

Bakı Dövlət Universiteti, Azərbaycan Memarlıq və İnşaat Universiteti, Azərbaycan Texniki Universiteti, Bakı Biznes Universiteti, Bakı Dövlət Rabitə və Nəqliyyat Kolleci, 2 nömrəli Bakı Baza Tibb Kolleci, Azərbaycan Dövlət Pedaqoji Kollecinin komandalarının mübarizə apardığı “Gənclər sağlam həyat tərzini seçir” devizi ilə basketbol idman növü üzrə turnirin final mərhələsi, Sabunçu Rayon İcra Hakimiyyəti ilə birgə rayonun Bakı Gənclər Mərkəzində narkomaniya ilə mübarizəyə dair tədbirlər keçirilib. Eyni zamanda, Bakı Gənclər Mərkəzinin sifarişi ilə hazırlanmış “Bir dəfə” adlı film nümayiş etdirilib.

Dövlət Komissiyasının işçi qrupu tərəfindən oktyabrda “Narkotiklər haqqında həqiqəti bilin”, “Marixuana haqqında həqiqət” və “Psixotrop maddələr haqqında həqiqət” adlı yeni üslubda hazırlanmış zəruri əyani təbliğat materialları təşkil edilən bütün təlim, dəyirmi masa və tədbirlərdə paylanılıb. Keçirilən silsilə tədbirlərin “Azərbaycan Televiziya və Radio Verilişləri” QSC, Azərbaycan Dövlət İnformasiya Agentliyi (AZƏRTAC) və digər kütləvi informasiya vasitələrində, o cümlədən Dövlət Komissiyasının rəsmi www.nmdk.gov.az internet səhifəsində və sosial şəbəkələrdə geniş işıqlandırılması təmin edilib.

Beləliklə, bu ilin oktyabr ayında ümumilikdə 37 tədbir - 1 idman turniri, 8 maarifləndirmə tədbiri, şəhər və rayon komissiyaları ilə 12 dəyirmi masa, Gənclərin İnkişaf və Karyera Mərkəzinin şəhər və rayonlarında fəaliyyət göstərən nümayəndəliklərində 12 təlim, dörd ümumtəhsil məktəbin şagirdləri üçün isə seminar təşkil edilib.