Ölkəmiz Beynəlxalq Astronavtika Konqresində təmsil olunacaq
Paris, 12 sentyabr, AZƏRTAC
Azərbaycan Respublikası Kosmik Agentliyi (Azərkosmos) ölkəmizi Parisdə keçiriləcək 73-cü Beynəlxalq Astronavtika Konqresində təmsil edəcək.
AZƏRTAC xəbər verir ki, sentyabrın 18-dən 22-dək Paris 73-cü Beynəlxalq Astronavtika Konqresinə (İAC) ev sahibliyi edəcək.
73-cü Beynəlxalq Astronavtika Konqresi “Kosmos hamı üçün” (“Space for @ll”) mövzusuna həsr olunub. Bu il Konqresə 97 ölkədən 4800 tezis və təqdimat göndərildiyi bildirilir. 73-cü Beynəlxalq Astronavtika Konqresinin əsas məqsədi astronavtika sənayesini təşviq etmək, peşəkarlar və kosmik sahədə ixtisaslaşmış qurumları bir-biri ilə əlaqələndirmək, tərəfdaşlarla geniş ictimaiyyət arasında kosmik problemlərə dair məlumatlılığı artırmaq, tədqiqat və innovasiyaların dəyərini vurğulamaqla, sektor daxilində və xaricində əldə olunan nəticələrin bölüşdürülməsini təmin etməkdir.
Xatırladaq ki, astronavtika, peyk sahələrində ixtisaslaşmış bir çox assosiasiyaların, eləcə də Beynəlxalq Astronavtika Federasiyasının üzvü olan, müxtəlif ölkələrin kosmik tədqiqatlar mərkəzi, aerokosmik agentlikləri ilə sazişlər imzalamış Azərkosmos 2023-cü ildə 74-cü Beynəlxalq Astronavtika Konqresinə ev sahibliyi edəcək.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
