SİYASƏT
OMBUDSMAN APARATI İLƏ YUNİSEF ARASINDA QARŞILIQLI ƏLAQƏLƏR GENİŞLƏNİR
Bakı, 13 fevral (AZƏRTAC). Ombudsman Elmira Süleymanova YUNİSEF-in Azərbaycan nümayəndəliyi rəhbərinin müavini Rəşid Mustafa ilə görüşmüşdür.
E.Süleymanova təsisatda uşaq hüquqlarının təmininə və təbliğinə diqqət yetirildiyini, fəaliyyət dövrü ərzində YUNİSEF-in ölkəmizdəki nümayəndəliyi ilə qarşılıqlı əlaqələr qurulduğunu diqqətə çatdırmışdır.
Ombudsman Aparatından bildirmişlər ki, görüşdə cari ildə əməkdaşlıq məsələləri müzakirə olunmuşdur. Uşaqlara qarşı zorakılıq halları ilə mübarizə tədbirlərinin daha da genişləndirilməsi, uşaq hüquqlarının müdafiəsi üzrə müstəqil qurumun yaradılması, yaxud Ombudsman Aparatında uşaq hüquqlarının müdafiəsi üzrə şöbənin təşkili ilə bağlı məsələyə toxunulmuşdur.