İQTİSADİYYAT
Ötən il Azərbaycan Sahibkarlar Konfederasiyası 43 rayonda nümayəndə strukturu formalaşdırıb
Bakı, 23 fevral, AZƏRTAC
Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) Rəyasət Heyətinin iclası keçirilib.
ASK-dan AZƏRTAC-a bildirilib ki, iclasda Azərbaycan Respublikasının Prezidenti İlham Əliyevin ölkə sahibkarlarına işğaldan azad edilmiş ərazilərdə iş yerlərinin yaradılması ilə bağlı çağırışı səsləndirilib, bu ərazilərdə gələcək biznes imkanları müzakirə edilib, habelə Azərbaycan Sahibkarlar Konfederasiyasının 2021-ci ilin hesabatı və 2022-ci ilin iş planı dinlənilib.
Azərbaycan Sahibkarlar Konfederasiyasının prezidenti Məmməd Musayev iclası açaraq, ötən ilin ümumilikdə ölkəmiz üçün uğurlu il olduğunu qeyd edib. O, Azərbaycan Respublikasının Prezidenti İlham Əliyevin rəhbərliyi ilə ölkəmizin inkişafı və doğma Qarabağımızın dirçəlişi ilə bağlı görülən işlərə görə dövlətimizin başçısına minnətdarlığını bildirib. Konfederasiya rəhbəri ölkə sahibkarlarını Prezidentin çağırışına dəstək verməklə işğaldan azad olunmuş ərazilərdə yeni iş yerləri yaratmağa dəvət edib.
Ötən ilin hesabatını təqdim edən Konfederasiyanın baş katib əvəzi Kristina Məmmədova bildirib ki, pandemiyanın yaratdığı məhdudiyyətlərə baxmayaraq, ASK öz fəaliyyətində böyük uğurlara nail olub, sahibkarların hüquqlarının müdafiəsi, dövlət-özəl dialoqunun qurulmasında rolunu daha da gücləndirib.
Belə ki, 2021-ci ildə Konfederasiya tərəfindən dövlət orqanları ilə sahibkarlar arasında müxtəlif mövzuları əhatə edən görüşlər və tədbirlər keçirilib, müxtəlif sektorları təmsil edən komissiyalardan daxil olan müraciətlər əsasında hökumətə təkliflər təqdim edilib.
2021-ci ildə Azərbaycan Sahibkarlar Konfederasiyası rayon sahibkarları arasında təmsilçiliyi genişləndirərək, ümumilikdə 43 rayonda nümayəndə strukturu formalaşdırıb və bununla da dövlət-özəl dialoqunda region sahibkarlarının fəallığını yüksəltməyə nail olub. Bununla bərabər Azərbaycan məhsullarının xarici ölkələrdə təbliği, investisiya mühitinin təşviq edilməsi, xaricdə çalışan iş adamlarımızla əlaqələrin qurulması üçün Azərbaycan Sahibkarlar Konfederasiyası təmsilçilik fəaliyyətini genişləndirib. Hazırda 23 xarici ölkədə Konfederasiyanın 21 nümayəndəsi fəaliyyət göstərir.
Ötən il ölkədə sahibkarlığın inkişafı, biznesin dəstəklənməsi məqsədilə Konfederasiya tərəfindən 20 qanunvericilik aktına əlavə və dəyişikliklər təklif edilib. Konfederasiya 30-a yaxın beynəlxalq tədbirə ev sahibliyi edib, ölkəmizdəki xarici diplomatik nümayəndələrlə 21 görüş keçirilib. Beynəlxalq əməkdaşlığın dərinləşdirilməsi məqsədilə xarici ölkələrdə fəaliyyət göstərən sahibkarlıq təşkilatları ilə 11 memorandum imzalanıb.
Konfederasiyanın baş katibinin müavini Xəqan Hümmətzadə sahibkarların məhkəmə çəkişmələrinin məhkəməyə qədər həllini təmin etmək məqsədilə Azərbaycan Sahibkarlar Konfederasiyasının təsisçiliyi ilə Mübahisələrin Alternativ Həlli Mərkəzinin yaradılması ilə bağlı fikirlərini səsləndirib. Qeyri-kommersiya təşkilatı kimi fəaliyyət göstərəcək Mərkəzin nizamnamə layihəsi və digər təsis sənədləri Rəyasət Heyətinə təqdim edilib.
Azərbaycan Sahibkarlar Konfederasiyasının Rəyasət Heyəti tərəfindən Mübahisələrin Alternativ Həlli Mərkəzinin təsis edilməsi ilə bağlı müvafiq qərar qəbul olunub.
Konfederasiyanın 2022-ci il üçün iş planı barədə vitse-prezident Vüqar Zeynalov təqdimatla çıxış edib. Onun sözlərinə görə, bu il dövlət-özəl dialoqunun daha da inkişaf etdirilməsi, dayanıqlı inkişaf məqsədləri, mediasiya fəaliyyətinin sistemləşdirilməsi, işğaldan azad olunmuş torpaqlarda iqtisadi fəaliyyətin dirçəldilməsi, sahibkarların maarifləndirilməsi və digər məsələlər iş planına daxil edilib.
Sonra Rəyasət Heyətinin üzvləri tərəfindən işğaldan azad olunmuş ərazilərimizə investisiya yatırılması ilə bağlı gələcək planlar dinlənilib, Azərbaycan Sahibkarlar Konfederasiyasının 2021-ci ilin hesabatı və 2022-ci ilin iş planı səsə qoyularaq qəbul olunub.
İşğaldan azad olunmuş ərazilərimizə investisiya yatırılması, yeni iş yerlərinin yaradılması ilə bağlı Azərbaycan Sahibkarlar Konfederasiyası adından ölkə sahibkarlarına çağırış qəbul edilib.