“QARANT SIĞORTA” HƏR BİR KƏSİN SIĞORTA ŞİRKƏTİ OLMAQ İSTƏYİR
AZƏRTAC xəbər verir ki, Azərbaycan maliyyə bazarında yeni fəaliyyətə başlamış “Qarant Sığorta” şirkəti cari ilin birinci rübünün nəticələri ilə bağlı aprelin 21-də “Hyatt Regency” mehmanxanasında mətbuat konfransı keçirmişdir.
“ZQAN” holdinqə daxil olan qurumun idarə heyətinin sədri Vaqif Həsənov bildirmişdir ki, əsas məqsədimiz hər kəsin sığorta şirkəti olmaqdır. Şirkət həm fərdi, həm də korporativ müştərilərinə 18 könüllü və 4 icbari sığorta növü üzrə xidmət təklif edir. Ötən ilin noyabrında yaranmış şirkətin nizamnamə kapitalının məbləği 1 milyon manatdır. Cari ilin birinci rübündə ümumi sığorta yığımlarının məbləği 500 min manat təşkil etmişdir.
Şirkətin müştəriləri qarşısındakı öhdəliklərinin yerinə yetirilməsinə həssaslıqla yanaşdığını söyləyən V.Həsənov fəaliyyətə yenicə başlamasına baxmayaraq, qurumun sığorta hadisəsi üzrə artıq 500 manat dəyərində ilk ödənişini həyata keçirdiyini, eləcə də dövlətə 30 min manat məbləğində vergi ödədiyini diqqətə çatdırmışdır.
Cari ilin birinci rübündə qurum mədəniyyət layihələrinə sponsorluq da etmişdir. Şirkət ABŞ-ın Azərbaycandakı səfirliyi, Mədəniyyət və Turizm Nazirliyi ilə birgə “Bətteri Dəns” rəqs qrupunun Cənubi Qafqazda ilk dəfə olaraq Bakıya səfərinə dəstək vermiş, Amerika Pianoçular Assosiasiyasının prezidenti, professor Coil Harrisonun və bir çox müsabiqələrin laureatı, ABŞ-ın caz ulduzu Dan Terferin ölkəyə səfərlərinə sponsorluq etmişdir.
Cari ilin sonunadək şirkət nizamnamə kapitalının məbləğini 2 dəfə artırmağı, sığorta yığımlarının məbləğini 5 milyon manata çatdırmağı nəzərdə tutmuşdur.
Sonda KİV nümayəndələrinin sualları cavablandırılmışdır.
