Qax, 12 fevral (AZƏRTAC). 2009-cu ildə Qax rayonunda ümumi daxili məhsul istehsalı 63 milyon 260 min manat olmuşdur. Hesabat ilində əvvəlki ildəkindən 228 min manat çox - 29 milyon 458 min manatlıq kənd təsərrüfatı məhsulları istehsal edilmişdir. Əhalinin pul gəlirləri 949 min manat artaraq 43 milyon 417 min manat olmuşdur. Rayon üzrə orta aylıq əmək haqqı 21 manat artaraq 136 manata çatmışdır. Regionların sosial-iqtisadi inkişafına dair ikinci Dövlət Proqramına uyğun olaraq il ərzində rayonda 325 yeni iş yeri yaradılmışdır.

Bu faktlar 2009-cu ilin yekunları və qarşıda duran vəzifələrə həsr olunmuş hesabat yığıncağında səsləndirilmişdir.

Tədbir iştirakçıları əvvəlcə ümummilli liderimiz Heydər Əliyevin mərkəzi meydanda ucaldılmış abidəsi önünə gül-çiçək düzmüş, xatirəsini ehtiramla yad etmiş, sonra mədəniyyət evinin foyesində rayonda istehsal olunmuş sənaye və kənd təsərrüfatı məhsulları sərgisinə, 2009-cu ildə qazanılmış uğurlardan bəhs edən filmə baxmışlar.

Rayon İcra hakimiyyətinin başçısı Telman Quliyevin hesabat məruzəsində daha sonra bildirilmişdir ki, rayonun iqtisadiyyatında mühüm rol oynayan aqrar sahənin inkişaf etdirilməsi diqqət mərkəzində saxlanılmışdır. İl ərzində 16 min 311 ton buğda, 530 ton quru tütün, 9440 ton meyvə, 2862 ton fındıq, 418,6 ton qoz, 2930 ton üzüm, 400 ton şəkər çuğunduru istehsal olunmuşdur. Bu ilin məhsulu üçün 11 min 541 hektar sahədə payızlıq taxıl səpilmişdir. Rayon iqtisadiyyatının ənənəvi sahələrindən olan tütünçülüyün inkişaf etdirilməsi sahəsində tədbirlər 2009-cu ildə də davam etdirilmişdir. “İnter-Tobaco” ASC-nin Qax filialı tərəfindən tütün məhsulunun yaşıl halda emalına imkan verən Bolqarıstan istehsalı olan daha 32 ədəd tütünqurutma kameraları gətirilərək quraşdırılmış, 13 min ton yaş tütün qurudulmuşdur.

Rayonda aparılan tikinti-quruculuq işləri barədə məlumat verən məruzəçi 2009-cu ildə şagird yerlərinin ümumi sayı 1080 olan 3 yeni məktəb binasının, Qarabağ müharibəsi əlilləri və şəhid ailələri üçün 16 mənzilli yaşayış binasının, Ədliyyə Nazirliyinin rayon qeydiyyat şöbəsi və statistika idarəsi üçün yeni inzibati binaların, tikiş sexinin, Malax çayı üzərində biraşırımlı körpünün tikilib istifadəyə verildiyini, mərkəzi rayon xəstəxanasında aparılan əsaslı təmir və yenidənqurma işlərinin başa çatdırıldığını, İdman Kompleksinin, Qaxbaş kəndində 200 yerlik hotelin tikintisinin davam etdirildiyini diqqətə çatdırmışdır. Qeyd olunmuşdur ki, hazırda Qax şəhərinin giriş hissəsində daxili imkanlar hesabına YAP rayon təşkilatı, habelə Uşaq Yaradıcılıq Mərkəzi üçün yeni binalar tikilir. Bundan əlavə, şəhərin 20 Yanvar küçəsində aparılan yenidənqurma işləri davam etdirilir, Heydər Əliyev küçəsində 4 hektar sahədə yeni park salınır.

Görülmüş işlərlə yanaşı 2010-cu ildə rayonda bir sıra obyektlərin tikintisi də nəzərdə tutulur. Kürmük çayı üzərində uzunluğu 640 metr olan körpünün, Vergilər Nazirliyinin Qax rayon Vergi Terminalının, Pavilyon ərazisində süd məhsulları emalı zavodunun, habelə cır meyvə tədarükü və emalı sexinin, Zəyəm kəndində 360 yerlik yeni məktəb binasının, Qax şəhərində uşaq istirahət mərkəzinin, yeni avtovağzal binasının, baytarlıq laboratoriyası, idman liseyi, qaz istismarı sahəsi, rayon məhkəməsi, İlisu kəndində Tarix və Mədəniyyət Qoruğu, habelə digər qurumlar üçün yeni inzibati binaların tikintisi, Almalı, Qorağan, Əlibəyli və Marsan kəndlərinin qazlaşdırılması, Qıpçaq, Almalı, Güllük və Əlibəyli kəndlərində yeni səhiyyə obyektlərinin tikintisi nəzərdə tutulmuşdur.

Məruzəçi çıxışında əhalinin elektrik enerjisi, təbii qaz, içməli su və digər xidmətlərlə təminatının yaxşılaşdırılması sahəsində görülmüş işlərə toxunmuş, bu sahədə yol verilmiş nöqsanların təcili aradan qaldırılması üçün əlaqədar qurumların rəhbərlərinə konkret tapşırıqlarını vermişdir.

Sonra məruzə ətrafında çıxışlar olmuşdur.

Yığıncaqda Prezident Administrasiyasının məsul əməkdaşı Məhərrəm Quliyev və Milli Məclisin deputatı Azər Kərimli çıxış edərək 2009-cu ildə respublikamızın əldə etdiyi uğurlardan danışmış, qarşıda duran vəzifələri qeyd etmiş, tövsiyələrini bildirmişlər.

######