Qazıntılar zamanı yeni aşkar olunmuş eksponatlar Qəbələ Arxeoloji Mərkəzində nümayiş etdirilir
Qəbələ, 27 avqust, Mustafa Dadaşov, AZƏRTAC
AMEA Arxeologiya və Etnoqrafiya İnstitutunun Qəbələ arxeoloji ekspedisiyasının rəisi, tarix elmləri doktoru, professor Qafar Cəbiyevin rəhbərliyi ilə Qəbələ Dövlət Tarix-Bədii Qoruğunun ərazisində aparılan tədqiqat işləri davam etdirilir.
Qoruğun direktoru Zahir Kərimov AZƏRTAC-ın bölgə müxbirinə bildirib ki, ekspedisiya tərəfindən Qafqaz Albaniyasının paytaxtı olmuş qədim Qəbələ şəhər mərkəzinin qalıqlarının olduğu Qala adlanan ərazidə əvvəlki illərdə tədqiqinə başlanmış IX sahədə bu ilin avqustunda aparılan qazıntı işlərindən uğurlu nəticələr əldə olunub. Belə ki, 2019-cu ildən tədqiqi yarımçıq qalmış IX sahədə aparılan tədqiqatlar zamanı yer səthindən 2,4 metr dərinlikdə 2,2 metr eni olan şimal qala divarlarının bünövrə hissəsi aşkara çıxarılıb. Qala divarının bünövrə hissəsi yonulmuş çay daşından, onun üstündən isə əsasən 22x22x5 santimetr və 25x25x5 santimetr ölçülü bişmiş kərpiclərdən istifadə olunmaqla inşa edilib. Tikintinin bünövrəsindən və onunla eyni səviyyədə olan mədəni təbəqədən götürülən maddi mədəniyyət qalıqları qeyd olunan müdafiə divarının XI əsrin ortalarında inşa olunduğunu göstərir.
Arxeoloji qazıntılar zamanı yeni əldə olunan maddi-mədəniyyət nümunələri (kiçik fayans və dairəvi oturacağa malik iri ölçülü kasa) arxeoloji ekspedisiyanın rəhbəri Qafar Cəbiyev tərəfindən Qəbələ Dövlət Tarix-Bədii Qoruğuna təhvil verilib və Arxeoloji Mərkəzin sərgi salonunda izləyicilər üçün nümayiş etdirilən eksponatların tərkibinə əlavə olunub.
Direktorun sözlərinə görə, Qəbələ Arxeoloji Mərkəzində arxeoloji ekspedisiyaların, alimlərin ilboyu səmərəli işləməsi, qalması, müxtəlif səviyyəli tədbirlərin keçirilməsi, əldə olunan yeni tapıntıların laboratoriya şəraitində təmizlənməsi, öyrənilməsi, mühafizəsi və nümayişi üçün bütün şərait yaradılıb. Mərkəzdə sərgilənən maddi mədəniyyət nümunələrinin mühafizəsi təşkil olunmaqla fond bölməsində saxlanılması təmin edilir. Arxeoloji qazıntılar zamanı aşkarlanmış müxtəlif əmək alətləri, soyuq silahlar, mis, bürünc, gümüş sikkələr, gil materiallarından hazırlanmış su boruları və digər qiymətli tapıntılar bölgənin tarixinin müxtəlif dövrlərini araşdırmaq baxımından mühüm əhəmiyyətə malikdir.
Bölmənin digər xəbərləri
