QUBA MƏZARLIĞINDA ARXEOLOJİ QAZINTILAR DAVAM EDİR
AZƏRTAC xəbər verir ki, Milli Elmlər Akademiyası Arxeologiya və Etnoqrafiya İnstitutunun xüsusi ekspedisiyası aprelin 8-dən Qubadakı kütləvi məzarlıqda tədqiqat işlərini davam etdirir. Xatırladaq ki, hava şəraitinin əlverişsizliyi üzündən burada tədqiqat işləri ötən ilin dekabrından müvəqqəti dayandırılmışdı.
Aparılan qazıntılar deməyə əsas verir ki, 1918-ci ildə ermənilərin Azərbaycanın bu bölgəsində törətdiyi soyqırımı nəticəsində minlərlə insan amansızlıqla qətlə yetirilmişdir.
Arxeoloji qazıntılar 3 mərhələdə davam etdirilir. Birinci mərhələdə sürüşmə nəticəsində dağılmış quyuların bərpası, ikinci mərhələdə ərazidə arxeoloji tədqiqatların davam etdirilməsi, sonuncu mərhələdə isə mövcud quyularda qazıntılar aparılması nəzərdə tutulmuşdur. Birinci mərhələ may ayının 8-də yekunlaşacaqdır.
“Quba” ekspedisiya qrupunun rəhbəri Qəhrəman Ağayev quyuların mühafizəsi ilə bağlı işlər aparıldığını bildirmişdir. Onun sözlərinə görə, davamlı olaraq aparılan arxeoloji qazıntılar zamanı tapılan insan sümükləri, o cümlədən kəllələr bu ərazidə dəhşətli soyqırımı faktını təsdiqləyən ən mühüm tapıntılardır. Bu soyqırımın dünya ictimaiyyətinə nümayiş etdirilməsi üçün Quba məzarlığı muzeyə çevrilməlidir.
Məlumat verildiyi kimi, indiyədək məzarlıqdan 161 insan kəlləsinin qalıqları tapılmışdır.
Bölmənin digər xəbərləri
