Bakı, 22 sentyabr, AZƏRTAC

Sentyabrın 22-də Dövlət Ekoloji Ekspertiza Agentliyində qurumuş və qəzalı ağacların götürülməsinə dair ictimai dinləmə keçirilib.

AZƏRTAC xəbər verir ki, ictimai dinləmədə Saray Modul tipli Vərəm Əleyhinə Xəstəxananın həyətində 60, Səhiyyə Nazirliyinin inzibati binasının həyətyanı ərazisində 25, Xəzər rayon Mərdəkan qəsəbəsində yerləşən “Sahil” düşərgəsində 8, Mərdəkan Reabilitasiya Pansionatının həyətyanı sahəsində 35 ədəd qurumuş və qəzalı vəziyyətdə olan ağacların götürülməsinə dair müzakirələr aparılıb.

Dövlət Ekoloji Ekspertiza Agentliyinin İdarə Heyətinin sədri Mirsalam Qənbərov bildirib ki, bəzən gün ərzində agentliyə müxtəlif ünvanlar üzrə 300-500-ə qədər qurumuş ağacın götürülməsi ilə bağlı müraciət daxil olur. Bildirilib ki, son vaxtlar xüsusən Bakı şəhəri və Abşeron yarımadasında ağacların quruması, qəzalı vəziyyətə düşməsi əsasən iki səbəblə bağlıdır. Ya vaxtında düzgün aqrotexniki qulluq göstərilməyib, ya da təbii olaraq xəstəliklə əlaqədar quruma baş verib.

Qeyd olunub ki, yaşıllıq mülkiyyətçilərinin üzərinə düşən öhdəliklər layiqincə yerinə yetirilsə, vaxtında qiymətləndirilmə aparılsa, kütləvi surətdə ağacların götürülməsi məsələləri ortaya çıxmaz.

Vurğulanıb ki, götürülməsi üçün müraciət edilən ağaclar arasında yaş köküstə olan, o cümlədən xilas edilməsi mümkün olan ağaclar da mövcuddur. Odur ki, müraciətlərin hamısına müsbət rəy verilməyəcək. Götürülməsi vacib olan ağacların yerinə kompensasiya olaraq yeniləri əkilməli, digərlərinin isə bərpa olunması üçün budama, yaxud digər aqrotexniki qulluq göstərilməlidir.

İctimai dinləmədə bələdiyyələrin, müxtəlif qurumların öz ərazilərində olan ağaclara vaxtında qulluq etmədiyi, nəticədə bəzən xeyli sayda ağacın quruduğu məsələsi də qaldırılıb. Bununla yanaşı, bələdiyyələrin, müxtəlif qurumların öz ərazilərində olan qəzalı ağaclarla bağlı agentliyə vaxtında məlumat vermədiyi, onun götürülməsi üçün rəy almadığı, nəticədə xoşagəlməz hallar yaşandığı diqqətə çatdırılıb. Qeyd olunub ki, bəzən qəzalı ağaclar küləkli hava şəraitində aşaraq insanlara yaxud əmlaka ziyan vurur. Məsələnin köklü surətdə həllini tapması üçün bələdiyyələrin nümayəndələri ilə görüşün keçirilməsi, qurumuş və qəzalı ağacların köçürülməsi, götürülməsi məsələsində operativliyin təmin olunması məqsədilə prosedurun sadələşdirilməsinə dair təkliflər səsləndirilib.