DÜNYA
Rəcəb Tayyib Ərdoğan: Taxıl müqaviləsinin uzadılması üçün heç bir maneə yoxdur
Bakı, 21 oktyabr, AZƏRTAC
Qara dəniz vasitəsilə Ukraynadan taxıl ixracına dair sazişin müddətinin uzadılması üçün heç bir maneə yoxdur.
AZƏRTAC “Daily Sabah” qəzetinə istinadla xəbər verir ki, bu barədə Türkiyə Prezidenti Rəcəb Tayyib Ərdoğan hava limanının açılış mərasimində iştirak etdiyi Azərbaycandan qayıdarkən jurnalistlərə deyib.
"Müqavilənin uzadılması üçün maneə yoxdur. Mən dünən axşam Ukrayna Prezidenti Volodimir Zelenski ilə və Rusiya lideri Vladimir Putinlə telefon danışıqlarında buna bir daha əmin oldum. Yaranacaq problemlərin həlli üçün də heç bir maneə olmayacaq”, - deyə Türkiyə Prezidenti bildirib.
Rəcəb Tayyib Ərdoğanın sözlərinə görə, taxıl sazişi çərçivəsində dünənədək dünya bazarlarına 8 milyon tondan çox Ukrayna taxılı tədarük olunub. Bunun 62 faizi Avropaya, 19,5 faizi Asiyaya, 13 faizi Afrikaya, 5,3 faizi isə Yaxın Şərq ölkələrinə göndərilib.
Xatırladaq ki, taxıl sazişinin müddəti noyabr ayında başa çatır.