Azərbaycan Respublikasının Prezidenti Heydər Əliyevin yanvarın 24-26-da Rusiya Federasiyasına dövlət səfəri bu ölkənin, eləcə də dünyanın müxtəlif kütləvi informasiya vasitələrinin diqqət mərkəzində olmuşdur. 

Rusiyanın informasiya agentlikləri, qəzetləri, radio və televiziya kanalları və s. dövlətimizin başçısının bu səfərinə xüsusi diqqət göstərmiş, səfərin bütün təfərrüatını əks etdirən çoxsaylı məlumatlar yaymışlar. Bunlardan bəzilərini müəyyən ixtisarla oxuculara təqdim edirik.

TƏXİRƏ SALINMIŞ SƏFƏR UĞURLA KEÇDİ

Bu səfər müəyyən edildiyi vaxtdan 3 ay sonra həyata kecirildi. Bu

gecikmənin səbəbi nə idi?

Heydər Əliyev şənbə günü, yanvarın 26-da İTAR-TASS agentliyində keçirilmiş mətbuat konfransında səfər zamanı imzalanmış 7 sənəddən başlıcası 2010-cu ilədək olan dövr üçün Azərbaycanla Rusiya arasında uzunmüddətli iqtisadi əməkdaşlıq haqqında müqaviləni yüksək qiymətləndirərək dedi ki, Azərbaycanın heç bir başqa ölkə ilə əməkdaşlığa dair belə proqramı yoxdur. Qəbələ RLS-dən Rusiyanın istifadə etməsinin prinsipləri və şərtləri haqqında şaziş də böyük əhəmiyyət kəsb edir. Efiri izləyən bu stansiya həmin sənəd imzalandıqdan sonra Azərbaycan xalqının mülkiyyətinə çevrildi. İndən belə Rusiya ondan yalnız icarəçi kimi istifadə edir.

Danışıqlar zamanı tərəflər dost respublikanın iqtisadiyyatında Rusiya kapitalının səmərəli iştirakının şərtləri barədə razılığa gəldilər. Hazırda Azərbaycanda 100 belə sənaye müəssisəsi fəaliyyət göstərir. Onların 20-si 100 faiz Rusiya kapitalı ilə işləyir, 50-si birgə müəssisədir, 30-da isə Rusiyanın ayrı-ayrı təşkilatlarının vəsaitlərindən istifadə edilir.

Yanacaq-energetika, metallurgiya, inşaat və nəqliyyat, informatizasiya və rabitə, yüngül sənaye və kənd təsərrüfatı Rusiya-Azərbaycan əməkdaşlığının öncül istiqamətləri kimi müəyyənləşdirilmişdir.

İki ölkə liderlərinin siyasi bəyanatını və Heydər Əliyevin jurnalistlərin suallarına cavablarını diqqətlə araşdırsaq, aydın olar ki, iki prezidentin danışıqlarında ən ciddi müzakirə edilmiş məsələ Qarabağ probleminin nizama salınması məsələsi olmuşdur. Azərbaycan Prezidentinin Rusiyaya səfəri, əslində, məhz həmin problemə görə üç ay təxirə salınmışdı. Bu məsələdə Rusiyanın mövqeyi xeyli dərəcədə dəyişmişdir.

Moskva lap əvvəldən, hələ sovet dövründən bu məsələni bərk dolaşığa salmışdı. 1989-cu ildə Dağlıq Qarabağda Azərbaycandan ayrılaraq Ermənistana birləşmək şüarları ilə nümayişlər başlayanda SSRİ prezidenti Mixayıl Qorbaçov Ermənistan və DQMV-nin nümayəndə heyətlərini SSRİ Ali Soveti Rəyasət Heyətinin iclasına dəvət etdi və “millətçilik niyyətlərinə” görə birbaşa efirdə telekameraların önündə onların abrını verdi.

1990-ci il yanvarın 20-də isə M.Qorbaçov qarşı-qarşıya duran tərəfləri ayırmaq və genişmiqyaslı hərbi əməliyyatların başlanmasına imkan verməmək üçün Sovet Ordusunu Dağlıq Qarabağa deyil, Bakıya yeritdi, bununla da Moskvanın Bakının yox, Yerevanın mövqeyini dəstəklədiyini nümayiş etdirdi.

Azərbaycanda bu aksiya çox ağrılı reaksiya doğurdu. Bakıda Şəhidlər xiyabanında sovet qoşunlarının qəfil güllələrindən həlak olmuş 137 qadın, qoca, uşaq, kişi və gənc dəfn olunmuşdur.

Bütün bunlar Bakı ilə Moskva arasında münasibətləri kəskin surətdə gərginləşdirdi, Azərbaycanda millətçilik əhval-ruhiyyəsinin kükrəyişinə səbəb oldu və Əbülfəz Elçibəy dalğa üzərində respublika prezidenti vəzifəsinə gəldi.

Lakin hər halda, Azərbaycan və rus xalqları arasındakı tarixİ köklərə malik qarşılıqlı rəğbət bu siyasi meyllərdən daha güclü oldu. Xüsusilə Heydər Əliyev hakimiyyətə gəldikdən sonra respublikanın xarici siyasətini ifrat-millətçi radikallardan xilas etdi, beynəlxalq aləmdə Azərbaycanın mövqeyini ardıcıl surətdə möhkəmlətməyə, ölkənin təkcə Türkiyə, İran, ABŞ-la deyil, həm də RF ilə əlaqələrini yaxşılaşdırmağa başladı.

Heydər Əliyev tez-tez təkrar edir: “Rusiyanı və Azərbaycanı bir- birindən ayırmaq olmaz. Azərbaycanın heç bir rəhbəri 200 illik sıx əməkdaşlığı və birgə həyatı qoparıb ata bilməz”.

Bu işarələr Moskvaya da gedib çatdı və Vladimir Putin ötən il Azərbaycanın dövlət başçısının Rusiyaya 2001-ci ilin noyabrında nəzərdə tutulmuş rəsmi səfəri ərəfəsində Qarabağ məsələsində Rusiyanın tarazlı mövqeyini bəyan etdi: “Rusiya özünün yanlış hərəkətləri ilə Ermənistan və Azərbaycan arasında artıq yaranmış tarazlığı pozmamalıdır”.

Bəyanat eşidildi. Azərbaycan tərəfi Rusiya-Azərbaycan münasibətlərinə “strateji tərəfdaşlıq xarakteri” vermək üçün zəmin hazırlamaqdan ötrü dövlət başçısının 2001-ci ilin noyabr ayına nəzərdə tutulmuş səfərini 2002-ci il yanvarın axırına keçirməyi Moskvadan xahiş etdi.

“Rossiyski biznes” qəzeti,

29 yanvar 2002-ci il

DƏRİN MƏMNUNLUQ HİSSİ İLƏ

Prezident Heydər Əliyevin iyirmi dəqiqəlik mətbuat konfransı sovet və Azərbaycan siyasi rəhbərliyi patriarxının Moskvaya üçgünlük səfərinin yekun mərhələsi oldu. Əliyevin jurnalistlərlə (özünün etirafına görə, onlara böyük hörməti var) görüşünün uzun sürməməsi onun öz səfərini olduqca uğurlu və məzmunlu səfər kimi qiymətləndirməsinə mane olmadı. Bu, səfərin xüsusən Rusiya Prezidenti ilə əvvəlcə Novo-Oqaryovodakı iqamətgahda, qeyri-formal şəraitdə, sonra da Kremldə təkbətək görüş zamanı aparılmış məsləhətləşmələr hissəsinə xüsusilə aid idi. Əliyev bir neçə dəfə vurğuladı ki, əgər əvvəllər Bakının Moskva ilə münasibətləri arzuedilən səviyyədə deyildisə, axır vaxtlar, Rusiyaya Putin başçılıq etməyə başlayandan sonra hər şey ayrı cür oldu, “tam qarşılıqlı anlaşma” yarandı və bu, vaxtı çatmış məsələləri operativ surətdə həll etməyə və ikitərəfli qarşılıqlı fəaliyyəti genişləndirməyə imkan verir.

Bunula razılaşmamaq olmaz. Məlumdur ki, Boris Yeltsin Heydər Əliyevi, yumşaq desək, xoşlamırdı və bu barədə xatirələrində də yazmışdır. Onlar nadir hallarda görüşür və bu görüşlər sırf protokol xarakteri daşıyırdı. Vladimir Putin isə prezident olduqdan sonra MDB çərçivəsində özünün ilk rəsmi səfərini Azərbaycana etmişdir.

Rusiya və Azərbaycan liderləri son iki ildə 16 dəfə görüşmüşlər. Heydər Əliyev bu faktı iftixarla nəzərə çarpdıraraq, əlavə etdi ki, indiki görüş xüsusilə mühüm məsələləri, o cümlədən, Qəbələ radiolokasiya stansiyasının müqəddəratı haqqında vaxtı çatmış məsələni həll etməyə imkan verdi.

Məlum olduğu kimi, Rusiyanın hava hücumundan müdafiə sisteminin işləməsi üçün mühüm olan bu obyekt ABŞ Raketdən müdafiə haqqında Müqavilədən çıxdıqdan sonra xüsusi əhəmiyyət kəsb etmişdir. Stansiya bütün Cənub yarımkürəsində ballistik raketlərin buraxılması barədə erkən xəbərvermə rejimində işləyir. Rusiya RLS-i hələ azı 20 il öz ixtiyarında saxlamağa çalışırdı. Azərbaycan isə bu müddətin dörd dəfə az olmasında təkid edirdi. Rusiyanın Azərbaycan ərazisindəki bu yeganə hərbi obyektinin icarə haqqında məsələsi də aydın deyildi.

Bakı icarə haqqı kimi ildə 5 milyon dolar almaq istəyirdi, Moskva isə 2 milyon dollar ödəməyə razı idi və onun da yarısını əmtəə ilə vermək üçün Bakını dilə tuturdu. Əldə edilmiş kompromis əladır: stansiya Azərbaycan tərəfinin mülkiyyəti olur, onun icarəsi (bu, 10 il davam edəcək) üçünsə RF hər il 7 milyon dollar ödəyəcəkdir. Bundan əlavə, Bakı indən belə rəsmən “informasiya-analitik mərkəz” adlandırılacaq Qəbələ RLS-in fəaliyyətinin nəticələrindən istifadə etmək hüququ almışdır. Mühüm bir məqam: bu obyektin mühafizəsi üzrə döyüş növbəsini Azərbaycanın hava hücumundan müdafiə qüvvələri çəkəcəklər. Bundan ötrü onların döyüş hazırlığı yüksəldilməlidir, ona görə də Moskva Azərbaycan hərbi hava qüvvələrinin modernləşdirilməsi, texniki təchizatının təkmilləşdirilməsi nəzərdə tutulan öhdəlik götürmüşdür.

Elə təkcə bunun özü Heydər Əliyevin bu sözlərini təsdiqləyir ki, hazırda Rusiya-Azərbaycan münasibətləri strateji tərəfdaşlıq xarakteri daşıyır və yüksələn xətlə inkişaf edəcəkdir. Halbuki tərəflər, bundan əlavə, əmtəə dövriyyəsinin xeyli genişləndirilməsini nəzərdə tutan uzunmüddətli iqtisadi əməkdaşlıq haqqında mühüm hökumətlərarası saziş, birgə rəsmi məlumat, bir neçə idarələrarası sənəd imzalamışlar...

Azərbaycan Prezidenti Xəzərin bölgüsü məsələsində “baxışların tam uyğun gəldiyini” böyük məmnunluqla vurğuladı. İndi Moskva, Bakı və Astana təklif olunan bölgü prinsipləri ilə hələlik razılaşmayan İrana və Türkmənistana qarşı vahid cəbhə ilə çıxış edirlər. Lakin Azərbaycan rəhbəri əmindir: Rusiyanın nüfuzu və siyasi çəkişi məhz elə bir amil olacaq ki, o, həmin problemi artıq yaxın gələcəkdə həll etməyə imkan verəcəkdir. Hər şeydən göründüyü kimi, Əliyev ümid edir ki, Moskva Aşqabadı Türkmənistanın sahib olmaq istədiyi bir sıra perspektivli yataqlardan Azərbaycanın xeyrinə imtina etməyə razı salacaqdır. Ola bilsin, bu ümid əsaslıdır: bitərəf Türkmənistan antitalib əməliyyatının hərbi seqmentinə qoşulmaqdan imtina etmək bir yana, Rusiyanın strateji tərəfdaşı kimi yüksək ada malik olmaq iddiasında da deyildir...

“Nezavisimaya qazeta”

28 yanvar 2002-ci il

X X X

HEYDƏR ƏLİYEV RUSİYA İLƏ MÜNASİBƏTLƏRDƏ

TƏRƏQQİDƏN “SON DƏRƏCƏ MƏMNUNDUR”

Azərbaycan Prezidenti Heydər Əliyevin Moskvaya dövlət səfəri ölkələrimiz arasında münasibətlərin nəzərə çarpacaq dərəcədə mülayimləşməsi dövrünə təsadüf etdi. Heydər Əliyevin bildirdiyi kimi, Rusiya ilə əməkdaşlığın genişləndirilməsinin Azərbaycan üçün “müstəsna əhəmiyyəti” var.

Moskva danışıqlarında ikitərəfli iqtisadi əməkdaşlıq məsələləri ilə yanaşı, beynəlxalq koalisiya iştirakçılarının apardıqları antiterror kampaniyası çərçivəsində Cənubi Qafqazda, Xəzər dənizi hövzəsində və Mərkəzi Asiya respublikalarında sabitliyin möhkəmlənməsi məsələlərinə də xüsusi diqqət yetirildi.

Vladimir Putin və Heydər Əliyev çeçen separatizmi ilə mübarizə tədbirləri haqqında məsələni də müzakirə etdilər. Hər iki Prezident regionda mövcud sərhədlərə hörmətlə yanaşılması prinsipinin vacibliyini vurğuladılar. Heydər Əliyev və Vladimir Putin Xəzər dənizi hövzəsi ölkələrinin əməkdaşlığı mövzusuna toxunaraq, Xəzər dənizi hövzəsinin hərbsizləşdirilməsi barədə Azərbaycanın təşəbbüsünü müzakirə etdilər. Lakin, müşahidəçilərin fikrincə Xəzər dənizində güclü hərbi donanması olan Moskva Bakının bu ideyasını çətin ki, dəstəkləsin.

Hökumət mənbələrinin məlumatına görə, Əliyev ilə Putin arasında danışıqların əsas mövzularından biri iki ölkə arasında hərbi-texniki əməkdaşlıq məsələsi olmuşdur. Söhbət ilk növbədə Qəbələ RLS-dən gedir. Əliyevin səfəri gedişində imzalanmış sazişdə Qəbələ radiolokasiya stansiyası “Azərbaycanın mülkiyyəti hesab olunur, Rusiya isə stansiyanı icarəyə götürmək və ondan 10 il müddətinə istifadə etmək hüququ qazanır”. Bundan əlavə, Qəbələdəki RLS-dən daxil olacaq məlumatın bir hissəsini Azərbaycan tərəfinə təqdim etmək nəzərdə tutulur. Qəbələ RLS-ın icarə haqqı ildə 7 milyon dollar təşkil edəcəkdir.

RF XİN-nin nümayəndəsi, ATƏT-in Minsk qrupunun Rusiyadan olan həmsədri Vladimir Kazimirovun Qarabağ probleminin “mərhələli həllinin” prioritetliyi barədə fikri Bakıda nikbinliklə qarşılanmışdır. Bu variantda Dağlıq Qarabağın hüdudlarından kənarda yerləşən ərazilərdən erməni silahlı qüvvələrini çıxarmaq, sonra isə mübahisəli ərazinin statusu barəsində danışıqlara başlamaq nəzərdə tutulur. Həmin məsələdə iki ölkənin mövqeləri yaxınlaşmışdır.

Danışıqlar nəticəsində yeddi sənəd, o cümlədən, Rusiya ilə Azərbaycan arasında iqtisadi əməkdaşlığın əsas prinsipləri və istiqamətləri barədə saziş imzalanmışdır.

“Rossiyskaya qazeta”, 26 yanvar 2002-ci il

X X X

MOSKVA İLƏ BAKI KEÇMİŞ İNCİKLİKLƏRİ UNUDARAQ, VAXTI ÇATMIŞ PROBLEMLƏRİN HƏLLİ ÜÇÜN SIX ƏMƏKDAŞLIQ ETMƏK QƏRARINA GƏLDİLƏR

“Mən qonaqpərvərliyə, səmimiyyətə, diqqətə və başlıcası isə, görüşlərimizin dostluq xarakterinə görə Vladimir Putinə son dərəcə minnətdaram”. Heydər Əliyevin bu sözləri Rusiya-Azərbaycan münasibətlərinin yeni mərhələyə qədəm qoymasının ən yaxşı təsdiqidir. Heydər Əliyevin Moskvaya səfərinin yekunlarına dair mətbuat konfransında etiraf etdiyi kimi, Azərbaycan öz müstəqilliyini elan etdikdən sonra keçən 10 il ərzində ikitərəfli münasibətlərdə “heç də hər şey rəvan olmamışdır”. İndi isə, görünür, vəziyyət dəyişir. Müşahidəçilər üç gün davam etmiş danışıqların yekunlarını qiymətləndirərək belə bir nəticəyə gəlməyə hazırdırlar ki, bu səfərə qədər Moskva ilə Bakı arasında mövcud olan etimadsızlıq kölgəsi, demək olar ki, tamamilə çəkilib getmişdir.

Özünüz diqqət yetirin: Rusiya Prezidenti Heydər Əliyevə şahanə qəbul təşkil etdi. İndiyə qədər MDB-nin digər ölkələrinin liderlərindən çox azı belə şərəfə nail olmuşdur. Yeri gəlmişkən, bu səfərə dövlət səfəri statusu vermək təşəbbüsünü məhz Vladimir Putin irəli sürmüşdür. Yanvarın 24-də Vnukovo-2 hava limanında Heydər Əliyevi RF Prezidentinin tapşırığı ilə şəxsən Rusiya hökumətinin başçısı Mixail Kasyanov qarşıladı. Bu, Rusiya hökumətinin Azərbaycandan gəlmiş qonağın səfərinə xüsusi diqqətinin əlaməti idi. İki dövlətin başçılarının ilk görüşü yanvarın 24-də RF Prezidentinin Novo-Oqaryovodakı iqamətgahında keçirildi. İki liderin əsas görüşü isə ertəsi gün, yanvarın 25-də Böyük Kreml sarayının Georgi salonunda oldu. Görüşün özünün təntənəli şəraitdə keçməsi əlamətdar idi: iki ölkənin prezidentləri salonun əks tərəflərindən qırmızı xalçanın üstü ilə bir-birlərinə doğru irəliləyərək dostcasına görüşdüşkdən sonra xatirə şəklı çəkdirdilər. Azərbaycanın və Rusiyanın milli himnləri səsləndi. Sonra Vladimir Putin və Heydər Əliyev Yaşıl qonaq otağına keçərək, ikitərəfli münasibətlərin ən müxtəlif aspektlərini təkbətək müzakirə etdilər. Daha bir mühüm məqam. Heydər Əliyev yanvarın 26-da mətbuat konfransında bir gün əvvəl Putinlər ailəsinin qonağı olduğunu etiraf etdi. Yanvarın 25-də Kremldəki danışıqlar geniş heyətdə keçirildi. Görüş başa çatdıqdan sonra tərəflər ikitərəfli münasibətlərin, demək olar ki, bütün spektrini əhatə edən yeddi birgə sənəd, o cümlədən 2010-cu ilədək olan dövr üçün iqtisadi sahədə ikitərəfli əməkdaşlığın əsasları barədə müqavilə imzaladılar. Müşahidəçilərin əvvəlcədən bildirdikləri kimi, iki ölkə arasında hərbi-texniki əməkdaşlıq məsələləri danışıqlarda böyük yer tutdu. RF prezidenti dedi: “Uzun illərdən bəri ilk dəfədir ki, Rusiya və Azərbaycanın hərbi idarələri əməkdaşlığa başlamışlar”. Prezident bunu da əlavə etdi ki, “deməli, digər sahələrdə, o cümlədən Xəzər dənizinin problemləri üzrə də səmərəli işləyə bilərik”.

Tərəflər hərbi sahədə mühüm sənəd - Azərbaycan ərazisində yerləşən Qəbələ radiolokasiya stansiyasının (RLS) 10 il müddətinə icarəyə verilməsi barədə sənəd imzaladılar. Bu sənəd hava hücumundan müdafiə sahəsində əməkdaşlıq üçün əsas yaradır. Sazişə uyğun olaraq RLS-ni havadan məhz Azərbaycanın hava hücumundan müdafiə qüvvələri qoruyacaqdır. Moskva isə Azərbaycanın hava hücumundan müdafiə qüvvələrinin modernləşdirilməsini öz üzərinə götürür. Rusiya daşınan əmlaka hüquqlarını özündə saxlayamaqla, stansiyanın icarəsinə görə Azərbaycana hər il 7 milyon ABŞ dolları ödəyəcəkdir. Bundan əlavə, Moskva 1997-ci ilin ortalarından RLS-dən istifadəyə görə yaxın 5 il ərzində Bakıya 31 milyon ABŞ dolları ödəməyi öhdəsinə götürür.

İki ölkənin prezidentləri eyni zamanda sərhədyanı bölgələrində qarşılıqlı münasibətlər və qonşu dövlətin ərazisində yaşayan öz vətəndaşlarının hüquqi statusu barədə razılıq əldə etdilər. Vladimir Putin və Heydər Əliyev birgə bəyanatı da imzaladılar. Birgə bəyanatda beynəlxalq terrorizmlə mübarizə məsələlərində “əməli ikitərəfli və çoxtərəfli əməkdaşlığı” inkişaf etdirmək niyyəti vurğulanır. Dövlət başçıları Dağlıq Qarabağ problemini müzakirə edərək bildirdilər ki, bu məsələdə sülh yolu ilə nizamasalmanın “heç bir alternativi yoxdur”.

Xəzər dənizinin statusu və neftin dünya bazarlarına nəqli ilə bağlı məsələlərin razılaşdırılmaşı danışıqların mühüm yekunlarından oldu. Bakı-Ceyhan “əsas ixrac neft kəmərinin” tikintisi layihəsinin mövcudluğu ərzində ilk dəfə olaraq Rusiya açıq surətdə bəyan etdi ki, layihənin həyata keçirilməsinə qoşula bilər. Yeri gəlmişkən, Azərbaycanın rəsmi mənbələrinin məlumatına görə, bu günlərdə ABŞ-ın vitse-prezidenti Riçard Çeyni Bakı-Ceyhan layihəsinə Vaşinqtonun 2,5 milyard dollar ayırmağa hazır olduğunu bəyan etmişdir. Azərbaycan Dövlət Neft Şirkətinin başçısı Natiq Əliyev bu məlumatı şərh edərək demişdir: “ABŞ-ın vitse-prezidenti Çeyninin bu bəyanatı həmin boru kəmərinin tikintisinə daha bir siyasi dəstəkdir. Hesab edirəm ki, o, həmin sözləri maliyyə təsisatlarının razılığı ilə demişdir”.

Xəzər dənizinin statusuna gəldikdə isə, Azərbaycan Prezidenti Heydər Əliyev yanvarın 26-da Moskvada mətbuat konfransında bu problemin həlli ilə bağlı nikbinliyini ifadə etdi. Prezident xatırlatdı ki, Vladimir Putinin ötən ilin yanvarında Bakıya səfəri zamanı tərəflər “Xəzər dənizində əməkdaşlığın prinsipləri haqqında” bəyanat imzalamışlar. Əliyev həmçinin vurğuladı ki, 2001-ci ilin noyabr ayında o və Qazaxıstan Prezidenti Nursultan Nazarbayev də belə bir sənəd imzalamışlar. Beləliklə, prezidentin dediyi kimi, üç dövlət - Rusiya, Qazaxıstan və Azərbaycan Xəzər dənizində əməkdaşlığın prinsipləri haqqında sənəd imzalamışlar. Hazırda Rusiya, Azərbaycan və Qazaxıstan Xəzər dənizində orta xəttin müəyyənləşdirilməsi barədə məsləhətləşmələr aparırlar. Tərəflər “bu nadir su hövzəsinin” təkindəki ehtiyatlardan istifadə edilməsi qaydalarını da müəyyən etməyə hazırlaşırlar.

Vladimir Putin və Heydər Əliyev üç günlük danışıqlar zamanı beynəlxalq terrorizmlə birgə mübarizə aparmaq barədə razılığa gəlmişlər. Azərbaycan Prezidenti demişdir: “biz koalisiyaya, alyansa daxilik və Rusiya ilə birlikdə antiterror əməliyyatında iştirak etməliyik”. Azərbaycan Prezidentinin dediyi kimi, Moskva ilə Bakı ikitərəfli münasibətləri innən belə strateji tərəfdaşlıq səviyyəsinə çatdırmağın zəruriliyi ilə razıdırlar.

“Strana ru.” Internet qəzeti

AZƏRTAC