Saatlılı pambıqçılar qısa müddətdə 1078 hektar sahəyə çiyid səpiblər
Saatlı, 16 aprel, Mahir Babayev, AZƏRTAC
Bir neçə gündür ki, Saatlıda çiyid səpininə başlanılıb. Məhsul istehsalçıları qısa müddətdə 1078 hektar sahəyə çiyid səpiblər. Ötən il respublika üzrə ən çox “ağ qızıl” istehsal edən rayon pambıqçıları bu il də qələbə əzmi ilə çalışır, daha çox məhsul istehsal etmək üçün bütün lazımi tədbirləri vaxtında həyata keçirirlər.
Rayon Statistika İdarəsindən AZƏRTAC-ın bölgə müxbirinə bildiriblər ki, bu il Saatlıda 16 min 820 hektar sahədə pambıq əkilməsi nəzərdə tutulub. Bu məqsədlə 2 min 645-dən çox torpaq mülkiyyətçisi ilə müqavilə bağlanılıb, səpin aqreqatları və digər mexanizmlər vaxtında təmir olunub, sahələr şumlanıb, arata qoyulub, malalanaraq səpin üçün hazırlanıb.
Rayonda fəaliyyət göstərən “MKT” MMC, “AZƏR PAMBIQ” MMC, “Aqro AZ” MMC, “Kənd Təsərrüfatı” MMC ilə bağlanan müqaviləyə əsasən məhsul istehsalçıları lazımi texnika, toxum, gübrə və kimyəvi preparatlarla təmin edilirlər. Səpin kampaniyası uğurla davam edir.
Qeyd edək ki, ötən il Saatlıda 25 min 756 ton məhsul tədarük olunub.
Bölmənin digər xəbərləri
