İQTİSADİYYAT
Şəki şəhərinin baş planının təqdimatı olmuşdur
![Şəki şəhərinin baş planının təqdimatı olmuşdur](/files/2012/1/1200x630/14071442225776733520_1200x630.jpg)
Şəki, 15 mart (AZƏRTAC). Şəki Şəhər İcra Hakimiyyətinin akt zalında şəhərin 2030-cu ilə qədərki dövrdə inkişafına dair baş planın müzakirəsi keçirilmişdir.
AZƏRTAC xəbər verir ki, Şəki ictimaiyyəti nümayəndələrinin iştirakı ilə keçirilən yığıncaqda şəhər icra hakimiyyətinin başçısı Elxan Usubov çıxış edərək Azərbaycanın şimal-qərb bölgəsində mühüm siyasi, sosial-iqtisadi və mədəni mərkəz hesab olunan Şəkinin orta əsr Şərq şəhərlərinə məxsus şəhərsalma mədəniyyətini özündə qoruyub saxlayan, bənzəri olmayan bir şəhər olduğunu bildirmişdir. O qeyd etmişdir ki, nadir tarixi-memarlıq abidələri- karvansaraylar, məscidlər, minarələr, qala divarları, evlər, körpülər bu şəhərin qədim memarlıq üslubundan xəbər verir.
Lakin bir zamanlar Şərqin nadir sənət incisi kimi tanınan bu şəhər biganəlik və özbaşınalıqdan xeyli ziyan çəkmişdir. Bu gün şəhərin milli memarlıq üslubunun qorunub saxlanması şərti ilə müasirləşdirilməsi ən vacib vəzifələrdən biri hesab olunur. Bu baxımdan Prezident İlham Əliyevin 2011-ci il sentyabrın 12-də imzaladığı “Şəki şəhərinin sosial-iqtisadi inkişafının sürətləndirilməsinə dair əlavə tədbirlər haqqında” Sərəncamın mühüm tarixi əhəmiyyəti vardır.
E.Usubov bildirmişdir ki, həmin sənəddə digər məsələlərlə yanaşı, əlaqədar dövlət qurumlarının razılaşdırılmış təklifləri əsasında 2030-cu ilə qədərki dövrdə Şəkinin inkişafına dair baş planın hazırlanması vəzifəsi qarşıya qoyulmuşdur. Bu müddət ərzində Dövlət Şəhərsalma və Arxitektura Komitəsinin əməkdaşları dəfələrlə Şəkidə olmuş, baş planın hazırlanması istiqamətində səmərəli iş aparmışlar.
Sonra Şəki şəhərinin baş planının təqdimatı olmuşdur.
Təqdimatı keçirən Dövlət Şəhərsalma və Arxitektura Komitəsi Dövlət Baş Layihə İnstitutunun direktoru Bəkir Əhmədov bildirmişdir ki, Şəki uzun illər şəhərin baş planı olmadan, fərdi şəkildə inkişaf etmişdir. Lakin belə bir nadir şəhərin baş planının olması olduqca vacib idi. Baş plan tərtib olunarkən şəhərin milli-memarlıq üslubunun qorunub saxlanması şərti ilə inkişaf etdirilməsi diqqət mərkəzində saxlanmışdır. Planda Şəki şəhərinin inkişaf strategiyasına uyğun tikinti-abadlıq işlərinin aparılması, tarixi mədəniyyət abidələrinin mühafizəsi, mövcud mədəni-tarixi potensialdan səmərəli istifadəyə xüsusi diqqət yetirilmişdir.
Baş planda şəhərin ərazisinin 2 min hektar, yəni 2 dəfəyə yaxın genişləndirilməsi nəzərdə tutulur. Bu məqsədlə ətrafda yerləşən Kiş, Oxud, İnçə və Qoxmuq kəndləri şəhərin ərazisinə qatılacaqdır. Şəhərsalma zamanı istirahət, turizm infrastrukturunun qədim memarlıq ənənələrinə uyğun yenidən qurulması nəzərdə tutulur. Eyni zamanda, layihədə əhali artımı, yeni yaşayış, istirahət, idman kompleksləri, əhaliyə mədəni-məişət xidməti, şəhərdaxili nəqliyyat, mühəndis-kommunikasiya şəbəkələri, kommunal təsərrüfatı, sənaye zonası, istehsal sahələrinə aid obyektlərin yerləşdiyi ərazilər əksini tapmışdır.
Təqdimatdan sonra layihənin memarları iştirakçıların baş planla bağlı çoxsaylı suallarını cavablandırmışlar.