BDU-nun jurnalı “Riyaziyyat, tətbiqi riyaziyyat” kateqoriyası üzrə 2-ci yerdə qərarlaşıb
Bakı, 1 iyul, AZƏRTAC
“Clarivate Analitics” Agentliyinin hesabatına əsasən, Bakı Dövlət Universitetinin (BDU) “Web of Science” bazasında indekslənən “Applied and Computational Mathematics” jurnalının impakt faktoru 4.6, beş illik orta impakt faktoru 3.0-dır.
Universitetdən AZƏRTAC-a bildirilib ki, jurnal dünyada “Riyaziyyat, tətbiqi riyaziyyat” kateqoriyası üzrə agentliyin JIF Rank siyahısında 331 beynəlxalq jurnal arasında 2-ci yerdə qərarlaşıb. Jurnal Avropa və MDB ölkələrində çap edilən nəşrlərin JIF Rank siyahısında öz liderliyini qoruyur.
Qeyd edək ki, BDU-nun nəzdində Tətbiqi Riyaziyyat Elmi-Tədqiqat İnstitutunda nəşr olunan jurnal 2008-ci ildə “Science Citation Index Expanded” siyahısına daxil edilib.
Jurnalın redaksiya heyətinə dünyanın 20-yə yaxın ölkəsini təmsil edən tanınmış alimlər daxildir.
Jurnalın indiyədək nəşr olunmuş 62 nömrəsində dünyanın 50-dən çox ölkəsini təmsil edən müəlliflərin 600-dək məqaləsi dərc olunub. İldə dörd nömrəsi işıq üzü görən jurnalda müasir tətbiqi və hesablama riyaziyyatının aktual problemləri üzrə əldə olunmuş ən son elmi nəticələr dərc edilir.
Bölmənin digər xəbərləri
