11 yaşını qeyd edən Oxu.az yeni layihəyə hazırlaşır – REPORTAJ
Bakı, 1 iyul, AZƏRTAC
Yeni yaş həm də hesabat vaxtıdır desək, yanılmarıq. Köhnə yaşda - ötən bir ildə hansı nailiyyətlər əldə edilib və həllini tapmayan məsələlərin aqibəti necə olacaq kimi suallar ətrafında düşünüb hesabat verməyi və bundan nəticə çıxarıb hərəkət etməyi bacaranlar həmişə uğur qazanacaq.
11 il ərzində ölkənin onlayn media məkanında özünəməxsus yer tutan Oxu.az xəbər saytı bu məqamlara xüsusi önəm verdiyinə görədir ki, ötən müddətdə nəinki mövcudluğunu qoruyub saxlaya bilib, həm də populyarlığını artırmaq yolunda irəliləyib. “Global Media Group” media holdinqinin tərkibində iki dildə (Azərbaycan və rus) fəaliyyət göstərən Oxu.az kütləvi oxucu auditoriyasını dəqiq və dürüst xəbərlərlə təmin etməyi qarşısına əsas məqsəd qoyub. Oxu.az müasir dövrün innovativ yeniliklərini də nəzərdən qaçırmır. Hazırkı dövrdə alternativ media resurslarının yarandığı bir şəraitdə zirvəyə çıxmaq qədər orada qalmaq da bir o qədər çətindir.
Bəs, Oxu.az saytı buna necə nail olur, oxucuların gündən-günə dəyişən tələbatlarını necə ödəyir? AZƏRTAC-ın əməkdaşı bu və ya digər suallara cavab tapmaq üçün Oxu.az-ın ad günü ərəfəsində saytın redaksiyasından reportaj hazırlayıb. Həmin reportajı təqdim edirik.
Oxu.az-ın baş redaktoru Ülvi Səfərov bu saytın yarandığı gündən etibarən ölkənin ən aktual xəbər saytı olduğunu, uzun müddətdir ki, bu marafonda birinci sırada yer aldığını bildirib. Zirvəyə çıxmağın xüsusi bacarıq və əziyyət tələb etdiyini vurğulayan baş redaktor həmin mövqedə qalmağın da bir o qədər çətin olduğunu vurğulayıb.
“Bilirsiniz ki, müasir dövrdə yeni media saytları və resursları meydana çıxır. Oxucular həmin alternativ platformalardan da informasiyanı əldə edə bilirlər. Belə bir məqamda biz birinciliyimizi qoruyub saxlamalıyıq. Eyni zamanda, xəbərləri dəqiq, qərəzsiz, vicdanlı şəkildə oxuculara çatdırmaq əsas məqsədimizdir. Hansısa məqamı qaçırsaq və oxucu həmin xəbəri Oxu.az-da tapmazsa, digər media qurumlarından geri qalmış olarıq. Ona görə də işimizdə məsuliyyətli olmaqla yanaşı, daim innovasiyaları da tətbiq etməyə çalışırıq. Burada çalışan əməkdaşların motivasiyası yüksəkdir və redaksiyalararası əlaqə maksimum səviyyədədir. Saytın həm Azərbaycan, həm də rusdilli redaksiyası gərgin iş rejimində çalışır. Çünki oxucunu 24 saat xəbərlə təmin etmək lazımdır.
Eyni zamanda, operativlikdən ziyadə, xəbəri dəqiq şəkildə oxucuya təqdim etmək saytın başlıca məqsədidir. Xəbəri operativ vermək naminə səhv şəkildə sayta tez yerləşdirməkdənsə, bir neçə dəqiqə gecikdirib daha düzgün şəkildə oxucuya çatdırmaq lazımdır. Mən həmişə bu tezisin tərəfdarı olmuşam”, - deyə Ülvi Səfərov söyləyib.
Yeniliklərdən söz düşmüşkən, bu yaxınlarda saytın dizaynında dəyişikliklər edilib. Düzdür, oxucu üçün saytın yeni görünüşünə uyğunlaşmaq bir qədər zaman tələb də bilər, lakin müasir tendensiyalardan qaçmaq mümkün deyil.
Bir müddətdən sonra saytda yeni bir layihənin reallaşdırılacağının anonsunu verən baş redaktor bunun Azərbaycan mediasında bir ilk olacağını vurğulayaraq əlavə edib:
“Artıq layihə üzrə bir neçə məsələ öz həllini tapıb. Ümid edirəm ki, digər saytlar da bizim yeni layihədən ilhamlanacaqlar. Bundan əlavə, sosial şəbəkə hesablarımızın hər zaman daha da təkmilləşdirilməsi üzərində iş aparırıq. Çünki artıq oxucular xəbərləri heç də həmişə saytlardan yox, birbaşa sosial şəbəkə hesablarından da izləyirlər.
Saytımızda siyasət, sosial, iqtisadiyyat, ordu, idman, kriminal, mədəniyyət və şou-biznes xəbərləri yerləşdirilir. Hər hansı sahə üzrə xüsusi ixtisaslaşmış sayt olmadığımıza görə, oxucu hər mövzuda informasiyaları Oxu.az-ın səhifələrindən tapıb oxuya bilir. Hesab edirəm ki, ötüb keçən 11 il ərzində də ilk pillədə yer almağımızın əsas səbəbi məhz budur”, - deyə Ü.Səfərov bildirib.
Qeyd edək ki, sayt oxucuların ünvanlandığı təklif və tənqidlərə açıqdır. Onlardan gələn rəylər diqqətdə saxlanılır, bəziləri isə reallaşdırılır. Oxu.az-a qədəm qoyduğu yeni yaşında da oxucularının etimadını qoruyub saxlamağı və yeni yaradıcılıq uğurları arzulayırıq!
Bölmənin digər xəbərləri
