OĞLAQLAR bu günlər qeyri-adi düşünmək bacarıqlarını işə salmalıdırlar. Həyatınızdakı dəyişikliklərə gözlənilməz tərzdə yanaşmanız və çevik reaksiya verməyiniz bütün işlərinizin də uğur qazanmağınıza rəvac verəcəkdir. Birdən-birə böyük qazanc əldə etmək xəyallarınızı bir kənara qoyun, çünki tələsən yalnız siz olacaqsınız. Tələsən də ki bildiyiniz kimi həmişə təndirə düşür. Hadisələr isə yavaş-yavaş, öz axarı ilə inkişaf edəcəkdir.

DOLÇALAR yeni maliyyə işləri və ümidverici layihələr üçün əlverişli həftəyə qədəm qoyurlar. Bu günlər rəhbərliklə münasibətləriniz uğurlu məcrada inkişaf edəcəkdir. Sizi maraqlandıran məsələlər asanlıqla və problemsiz həll olunacaqdır. Həyatın sizə bəxş etdiyi gözəl fürsətlərdən dəyərlənməyə çalışın. Amma çox da bədxərclik etməyin. Üstəlik, astroloqlar borc verməyi məsləhət görmürlər.

BALIQLARA səbəbsiz yerə ətrafdakıların gününü göy əskiyə bükməkdənsə, keçmiş uğursuzluqların səbəblərini araşdırıb, yeni perspektivlər barədə düşünmək daha faydalı olardı. Gözlədiyiniz gəlir artıq yoldadır. Sadəcə öhdəlik-filan götürməməyə çalışın. İşinizin başınızdan aşması həyatın digər sahələrində istedadlarınızı nümayiş etdirməyə mane olmayacaqdır.

QOÇLAR strateji planlar qurmağa həddindən artıq aludə ola bilərlər. Yaxşı olar, ən vacib problemlər barədə düşünəsiniz. Bu həftə başınız görüş və danışıqlardan ayılmayacaqdır. Gələcəkdə çətinliklərlə üzləşməmək üçün tərəfdaşların sizi düzgün anladıqlarına əmin olmalısınız. Əsassız fikir və şübhələrin içinizi yeməsinə imkan verməyin. Şayiələrə inanmamışdan əvvəl vəziyyəti yaxşı-yaxşı araşdırın, işin kökünə getməyə çalışın.

BUĞALAR nə öz imkanlarını şişirtməməli, nə də kənardan ciddi köməyə ümid bəsləməlidirlər. Yaxşı olar, özünüzə qarşı tələbkarlığın dozasını bir balaca azaldasınız. Onda məyusluqlardan qurtula bilərsiniz. Qanınızı qaraltmayın. Əsas məsələni mütləq həll edəcəksiniz. xırda-para işlərin öhdəsindən isə daha sonra gəlmək olar. Maliyyə durumunuz sabit olmağına sabitdir, amma ehtiyatı əldən verməməyi tələb edir.

ƏKİZLƏR bu həftə özlərində yeni keyfiyyət və istedadlar üzə çıxaracaqlar. Yeni kəşfiniz həm özünüzə, həm də bütün ətrafınıza faydalı olacaqdır. Nəhayət ki, ürək dolusu danışıb gülə biləcəksiniz. Amma bir şərtlə. Səxavət kisənizin ağzını açıb yığdıqlarınızı bir anda havaya sovurmaq sonunda başınıza hava gətirə bilər. Odur ki, nəyisə almamışdan əvvəl yaxşıca düşünün: bu, sizə lazımdırmı, yaxud indiki halda nə dərəcədə lazımdır?

XƏRÇƏNGLƏR onları gözləyən dəyişikliklərdən qorxmamalıdırlar. Siz azacıq səylə əhəmiyyətli nəticələr əldə edə bilərsiniz. Sadəcə avantüralara və qaranlıq layihələrə baş qoşmamağa çalışın. Diqqətiniz cəmləsəniz əmin olacaqsınız ki, çox insanın sizə ehtiyacı vardır. Məsləkdaşlarınız işıqlı ideyalarınızı və nailiyyətlərinizi yüksək qiymətləndirəcəklər.

ŞİRLƏR bu həftə faydalı tanışlıqlar, lazımlı adamlarla işgüzar münasibətlər quracaqlar. Yeni əlaqələriniz yaxın gələcəkdə sizə yaradıcılıq və peşəkarlıqla bağlı ambisiyalarınızı tam gerçəkləşdirmək imkanı verəcəkdir. İşgüzar sahədə qarşınızda yeni-yeni üfüqlər açılır. Odur ki, cəsarətlə irəli. Perspektiv planlarınızı həyata keçirmək imkanını əldən verməyin.

QIZLAR sonraya saxladıqları bütün məsələləri bu həftə həll edə biləcəklər. Yeni insanlarla tanışlıq uzunmüddətli xarakter daşıyacaq və gələcəkdə karyera yüksəlişinizə kömək edəcəkdir. Təşəbbüsləriniz uğurla nəticələnəcək və tərəf-müqabiliniz tərəfindən dəstəklənəcəkdir.

TƏRƏZİLƏR məqsədə çatmaq üçün bütün vasitələri ələ keçirəcəklər. İndiki halda inadkarlığınız sizə nəinki mane olmaz, hətta düşündüklərinizi həyata keçirməyə kömək edib həyatınızı rövnəqləndirə bilər. Həftə həm də o cəhətdən maraqlıdır ki, toz basmış ümidsiz planlarınız real cizgilər alacaqdır. Sizin başlıca vəzifəniz başladığınız işləri yarı yolda qoymamaqdır.

ƏQRƏBLƏR bu həftə tələsməməli, müəyyən qaydalar çərçivəsində hərəkət edib, çılğınlıqlarını yatırtmağa çalışmalıdırlar. Son dərəcə səliqəli və tədbirli olmalısınız, yoxsa bəzi mövqeləriniz laxlaya bilər. Maliyyə cəbhəsində müvəqqəti sakitlikdir. Belə vəziyyət sizdən ağıllı qənaət tələb edəcəkdir. Amma unutmayın ki, qənaətcil olmağın simicliklə heç bir əlaqəsi yoxdur.

OXATANLARI yeni işgüzar perspektivlər gözləyir. Bu həftə istənilən təşəbbüsünüz gözəl bəhrə verəcəkdir. Gərgin əməyiniz rəhbərlik və ətrafdakılar tərəfindən çox yüksək qiymətləndiriləcəkdir. İş cədvəlinizin sıx olmasına baxmayaraq, istirahət etməyi yaddan çıxarmayın. İstirahət günləri yaxınlarınızın, doğmalarınızın və dostlarınızın cazibə mərkəzinə çevriləcəksiniz. Hazırcavablığınızla seçiləcək və kampaniyanın döyünən ürəyi olacaqsınız.