İQTİSADİYYAT
SOCAR Rumıniyada fəaliyyət göstərən yanacaqdoldurma məntəqələrinin sayı 33-ə çatıb
Bakı, 16 mart, AZƏRTAC
SOCAR Rumıniyada investisiya layihələrini uğurla davam etdirərək, yanacaqdoldurma şəbəkəsini ilbəil genişləndirir. Martın 16-da Buxarestdə “SOCAR” brendi ilə növbəti yanacaqdoldurma məntəqəsi (YDM) istifadəyə verilib. Bununla da Rumıniyada “SOCAR” brendi ilə fəaliyyət göstərən YDM-lərin sayı 33-ə çatıb.
SOCAR-ın mətbuat xidmətindən AZƏRTAC-a bildirilib ki, YDM-in açılış mərasimində Rumıniya Parlamentinin deputatları, Azərbaycan və Türkiyənin Rumıniyadakı səfirləri, bu ölkədə fəaliyyət göstərən bir çox aparıcı şirkətlərin rəhbərləri, Türk İş Adamları Dərnəyinin nümayəndələri, “SOCAR Petroleum SA” şirkətinin əməkdaşları, Rumıniyada yaşayan və təhsil alan azərbaycanlılar, habelə yerli KİV nümayəndələri iştirak ediblər.
Mərasimdə çıxış edən “SOCAR Petroleum SA” şirkətinin baş direktoru Həmzə Kərimov bildirib ki, Buxarest-Konstanta magistral yolu üzərində yerləşən yeni stansiyada təklif olunan yüksək keyfiyyətli məhsul və xidmətlərdən müştərilərin razı qalacağına əmindirlər. Avro Dizel 5, Super Avro Dizel 5, Benzin 95 və 98 tipli yanacaq məhsulları satışının həyata keçiriləcəyi məntəqədə 3 sayğac quraşdırılıb. Burada 4 kiçik nəqliyyat vasitəsi və 2 iritutumlu yük maşınının eyni zamanda yanacaqla təmin edilməsi mümkündür. Məntəqədə elektromobillərin enerji ilə təminatı, həmçinin “Roviniete” (yol vergisi) də daxil olmaqla bir sıra ödənişlərin edilməsi üçün xüsusi avadanlıqlar quraşdırılıb, eləcə də 24 saat ATM xidməti fəaliyyət göstərir. Müştərilərə “Nar” kafedə ənənəvi Azərbaycan məhsulları, 24 saat pulsuz internet xidməti təklif olunur.
SOCAR Rumıniyanın artıq 16 regionunda - Botoşan, Suçeava, Nyamts, İaşi, Bihor, Buzau, Bakau, Vrancea, Timiş, İlfov, Kluj, Valcea, Arad, Bistritsa-Nasaud, Sibiu və Buxarestdə yanacaqdoldurma məntəqələrinə malikdir.