STRASBURQDA AVROPA ŞURASININ YENİ BİNASI İSTİFADƏYƏ VERİLMİŞDİR
AZƏRTAC-ın xüsusi müxbiri xəbər verir ki, Strasburqda Avropa Şurasının yeni binasının istifadəyə verilməsi ilə əlaqədar təntənəli açılış mərasimi keçirilmişdir.
Mərasimdə Fransanın xarici işlər naziri Bernar Kuşner, Avropa Şurası Parlament Assambleyasının sədri Luis Maria de Puç, Avropa Şurasının baş katibi Terri Devis, Nazirlər Komitəsinin yüksək rütbəli nümayəndəsi Emil Kuxar və Strasburq şəhərinin meri Rolan Pis iştirak etmişlər.
Açılış lentini Bernar Kuşner kəsmişdir.
Mərasimdə Luis Maria de Puç, Emil Kuxar və Bernar Kuşner çıxış edərək Avropa Şurasının beynəlxalq aləmdəki nüfuzundan danışmış, insan hüquqlarının və demokratiyanın təşkilatın prioritetləri olduğunu xatırlatmış, Avropa dəyərlərinin qorunub saxlanması sahəsində qurumun fəaliyyətini yüksək dəyərləndirmişlər.
Avropa Şurasının əsas iqamətgahından bir qədər aralı, Avropa Məhkəməsinin yaxınlığında istifadəyə verilmiş binanın tikintisində müasir arxitektura layihələrindən istifadə edilmişdir. Yeni üslubda tikilmiş bina hər cür avadanlıq və mebellə təchiz edilmişdir.
“Aqro” adlanan bina Avropa Şurasının üzvü olan ölkələrin bir növ simvolunu xatırladır.
AŞ-nin yeni ofis binasının ilk təməl daşı 2004-cü il mayın 12-də həmin dövrdə Nazirlər Komitəsinə sədrlik etmiş Niderland Krallığının xarici işlər naziri Bernar Bot tərəfindən qoyulmuşdur.
Bölmənin digər xəbərləri
