Bakı, 23 aprel (AZƏRTAC). Aprelin 23-də Suraxanı rayonunda Prezidenti İlham Əliyevin sədrliyi ilə Nazirlər Kabinetinin 2012-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında dövlətimizin başçısının nitqindən irəli gələn vəzifələrə həsr olunmuş hesabat yığıncağı keçirilmişdir.

AZƏRTAC xəbər verir ki, hesabat yığıncağında Suraxanı rayonunda cari ilin birinci rübündə görülmüş işlərə yekun vurulmuş və qarşıda duran vəzifələr müzakirə olunmuşdur.

Məlumat verilmişdir ki, qəbul edilmiş dövlət proqramlarının icrası ilə əlaqədar Suraxanı rayonunda ötən dövr ərzində xeyli iş görülmüşdür. Rayonun müəssisələri cari ilin birinci rübü ərzində 83,9 milyon manatlıq iş yerinə yetirmiş, bir işçinin orta aylıq əmək haqqı 497 manata çatmış, müəssisələrdə və firmalarda 773 nəfər yeni iş yerləri ilə təmin olunmuşdur.

Rayon icra hakimiyyətinin və İqtisadi İnkişaf Nazirliyinin Sahibkarlığa Kömək Milli Fondunun birgə təşkilatçılığı ilə sahibkarlar üçün növbəti kredit yarmarkası keçirilmiş, 4 sahibkara 50 min manat məbləğində güzəştli kreditlər verilmişdir.

Zığ dairəsi-Heydər Əliyev Beynəlxalq Aeroportu avtomobil yolunun və Heydər Əliyev prospektinin Suraxanı rayonu ərazisindən keçən hissəsinin ətrafında dekorativ divarların tikilməsi, xüsusi layihə əsasında növbəti beşinci parkın salınması işlərinə başlanılmış, yolun kənarlarının yaşıllaşdırılması və abadlaşdırılması işləri davam etdirilmişdir. Yeni Günəşli yaşayış sahəsində yeni parkın salınmasına başlanılmışdır.

Hövsan qəsəbəsinin İ.Əhlimanov, E.Qasımov və E.Məmmədov küçələrində yerləşən çoxmərtəbəli yaşayış binalarında 9964 kvadratmetr ölçüdə dam örtüyü metal keramika ilə örtülmüşdür.

“Atəşgah Məbədi” Dövlət Tarixi-Memarlıq Qoruğunun ətrafının abadlaşdırılması, Heydər Əliyev prospektini “Atəşgah” məbədi ilə birləşdirən S.Bəhlulzadə və V.Balandin küçələrində yerləşən qeyri-yaşayış obyektlərinin fasadlarının təmir olunaraq rənglənməsi işləri davam etdirilmişdir.

Qəsəbələrarası yollara və məhəllədaxili ərazilərə 20000 kvadratmetr asfalt örtüyü salınmış, Yeni Suraxanı qəsəbəsinin Aşağı qəsəbə və Yuxarı mədən küçələrində 2551 paqon metr yeni kanalizasiya xətti çəkilmiş, qaz və elektrik şəbəkələrinin qurulması davam etdirilmişdir.

Hövsan-Binə-Dədə Qorqud-Bahar qəsəbələri ətrafı 300 hektar ərazidə müvafiq torpaq işlərinin görülməsi, suvarma sisteminin qurulması və ərazinin yaşıllaşdırılması, Hövsan qəsəbəsində və Hövsan kəndində əkin və həyətyanı sahələrin su təminatının yaxşılaşdırılması məqsədilə 215,7 kilometr uzunluğunda boru xəttinin yenidən qurulması və digər müvafiq işlərin görülməsi işlərinə başlanılmışdır.

Bülbülə qəsəbəsində 640 şagird yerlik yeni məktəb binasının, 85 nömrəli məktəb üçün 480 şagird yerlik əlavə tədris korpusunun tikintisi davam etdirilir. Rayondakı 89, 101, 104, 279, 280, 290 nömrəli məktəblərinin, 2 nömrəli uşaq evinin, 262, 273 nömrəli körpələr evi-uşaq bağçalarının, 12 nömrəli birləşmiş şəhər xəstəxanasının, 31 nömrəli şəhər poliklinikasının əsaslı təmirinə, 2 nömrəli bərpa xəstəxanasının yeni binasının tikintisinə başlanılmışdır.

Hövsan qəsəbəsində şəhid ailələri və Qarabağ müharibəsi əlilləri üçün 81 mənzilli 9 mərtəbəli bina inşa edilir.

Zığ dairəsi-Heydər Əliyev Beynəlxalq Aeroportu avtomobil yolundan Qala stansiyasına və dənizin sahilinə gedən avtomobil yolu tikilir.

Ümumi sahəsi 160 hektar olan Zığ gölünün və onun ətrafında neftlə çirklənmiş torpaqların təmizlənməsi məqsədilə Ekologiya və Təbii Sərvətlər Nazirliyi tərəfindən layihə hazırlanmış və işlərin görülməsinə başlanılmışdır.

Göstərilən dövr ərzində rayonda bir çox ictimai-siyasi tədbir keçirilmiş, idarə və müəssisələrin kollektivləri, rayon sakinləri, o cümlədən gənclərlə aparılan təbliğat işləri zamanı rayonun Heydər Əliyev Mərkəzinin geniş imkanlarından istifadə edilmişdir.

Hər il olduğu kimi, bu il də rayonu təmsil edən idmançılar beynəlxalq yarış və turnirlərdə uğurla çıxış edirlər. Aprelin 8-dən 16-dək Türkiyədə keçirilmiş ağırlıq qaldırma üzrə Avropa çempionatında iştirak edən rayonun “Nəhəng” idman klubunun yetirmələri Əfqan Bayramov birinci yerə, İntiqam Zairov isə üçüncü yerə layiq görülmüşlər.

Dövlət Proqramına əsasən rayonda “Gənclər evi”nin tikintisinə başlanılmış, Bülbülə qəsəbəsində mini futbol meydançasının, Qaraçuxur qəsəbəsində Olimpiya idman zalının, Yeni Günəşli yaşayış sahəsində şahmat məktəbinin və süni örtüklü mini futbol meydançasının tikintisi üçün torpaq sahəsi ayrılmış və yaxın günlərdə tikinti işlərinə başlanacaqdır.

Suraxanı Rayon Məşğulluq Mərkəzinə müraciət etmiş 266 nəfərdən 150 nəfəri işlə təmin olunmuş, 32 nəfərə işsizlik müavinəti təyin edilmiş, 12 nəfər peşə hazırlığı kurslarına göndərilmişdir.

Əhalinin sosial müdafiəsi mərkəzinin rayon şöbəsi tərəfindən rüb ərzində 204 yeni sosial müavinət təyin edilmiş, imtiyazlı təbəqəyə aid olan ailələrə 1,21 milyon manat məbləğində sosial müavinət ödənilmiş, 1000 ailəyə ünvanlı sosial yardım təyin edilmiş, imtiyazlı ailələrə 1,278 milyon manat məbləğində ünvanlı sosial yardım ödənilmişdir. Dövlət Sosial Müdafiə Fondunun rayon şöbəsi tərəfindən 28103 təqaüdçüyə 12,54 milyon manat pensiya ödənilmişdir.

Kənd Təsərrüfatı Nazirliyi ilə birgə təşkil edilmiş kənd təsərrüfatı məhsullarının satış yarmarkalarında rayon əhalisinə 302 ton kənd təsərrüfatı məhsulları satılmışdır.