İQTİSADİYYAT
Tovuzda cari ilin birinci rübündə görülən işlər və qarşıda duran vəzifələr müzakirə edilmişdir
Tovuz, 23 aprel (AZƏRTAC). Aprelin 23-də Tovuz Rayon İcra Hakimiyyətinin iclas zalında cari ilin birinci rübündə görülən işlər və qarşıda duran vəzifələrə həsr olunmuş şura iclası keçirilmişdir.
AZƏRTAC xəbər verir ki, yığıncaqda bu il aprelin 12-də Prezident İlham Əliyevin ölkənin qərb bölgəsinə səfəri çərçivəsində Tovuz rayonunda olmasından, rayonda aparılan tikinti, quruculuq və abadlıq işləri ilə tanışlığından, rayonun sosial-iqtisadi inkişafı və qarşıda duran vəzifələr barədə öz tapşırıq və tövsiyələrini verməsindən geniş bəhs edilmişdir.
Bildirilmişdir ki, bu gün tovuzlular Azərbaycan Prezidentinin rayona səfərinin xoş təəssüratını yaşayırlar. Qeyd edilmişdir ki, cari ilin birinci rübündə rayonda 2 milyon 339 min manatlıq sənaye məhsulu, 6 milyon 558 min manatlıq kənd təsərrüfatı məhsulları istehsal olunmuş, 185 min 500 manat həcmində poçt və rabitə xidməti göstərilmiş, pərakəndə əmtəə dövriyyəsinin həcmi 44 milyon 919 min manat təşkil etmiş, əhaliyə 10 milyon 9 min manat həcmində pullu xidmətlər göstərilmişdir. Nəqliyyat sektorunda yük daşınması 111 min ton təşkil etmişdir.
Ötə ilin eyni dövrü ilə müqayisədə kənd təsərrüfatında 6 faiz, poçt və rabitə xidmətində 5 faiz, pərakəndə əmtəə dövriyyəsində 11 faiz, əhaliyə göstərilən pullu xidmətlərin həcmində 10 faiz, sənaye məhsulunun ümumi həcmində 13.5 faiz, əsas kapitala yönəlmiş investisiyalarda 30,8 faiz artım əldə edilmişdir.
Birinci rübdə abadlıq-quruculuq işləri davam etdirilmişdir. Tovuz şəhəri üzrə həyata keçirilən layihələrin ən mühümü şəhərin su təchizatı və kanalizasiya sistemlərinin yenidən qurulması layihəsidir. Layihənin bu ilin sonunadək başa çatdırılması nəzərdə tutulur. Rayonun iqtisadiyyatı üçün mühüm əhəmiyyət kəsb edən Tovuzçay üzərində dəryaçanın tikintisi davam edir. 2012-ci ildə layihənin icrası üçün 17 milyon 800 min manat vəsait ayrılmışdır. Həmin layihə çərçivəsində bu anbardan Sağ Sahil Ağstafaçay kanalını qidalandırmaq üçün 7 km uzunluğunda polad su borusunun tikintisinin davam etdirilməsi üçün 1,4 milyon manat vəsait ayrılmışdır. Cari ildə Tovuz-Qovlar-Ağbaşlar avtomobil yolunun yenidən qurulması işlərinə başlanılmış və yolun 13 kilometr hissəsinə asfalt-beton örtük qoyulmuşdur.
Diqqətə çatdırılmışdır ki, N.Tusi adına 1176 şagird yerlik Tovuz şəhər, E.Məmmədov adına 360 şagird yerlik və M.Yusifov adına 180 şagird yerlik Məşədivəllər tam orta məktəblərinin tikintisi davam etdirilir. X.Cəfərov adına 80 şagird yerlik Qazıqulu kənd ümumi orta məktəbinin və Tovuz şəhərində uşaq bağçasının tikintisi başa çatdırılmışdır. 220 şagird yerlik Bayramlı, 180 şagird yerlik Papaqçılar və 180 şagird yerlik Səfərli kənd tam orta məktəblərinin yeni binalarının layihə-smeta sənədləri hazırlanmaqdadır. Yaxın vaxtlarda həmin məktəb binalarının da tikintisinə başlanılacaqdır.
Sahibkarlığın inkişafı ilə əlaqədar aparılan dövlət siyasətinə uyğun olaraq cari ilin birinci rübündə rayon üzrə özəl sektorda çalışan hüquqi və fiziki şəxslərin sayı müvafiq olaraq 6 ədəd və 391 ədəd artaraq, 681 və 7312 ədəd olmuşdur. Sahibkarlığa Kömək Milli Fondundan 2 layihə üzrə 240 min manat, digər banklardan isə fiziki şəxslərə 3209,3 min manat kreditlər verilmişdir.
Məruzə və çıxışlarda görülmüş işlərlə yanaşı mövcud problem və çatışmazlıqlardan da danışılmış, qarşıda duran vəzifələr müəyyənləşdirilmişdir.
Yığıncaqda Prezident Administrasiyasının məsul işçisi Habil Əzəmmədov çıxış etmişdir.