Türkiyəli baş məşqçi: Oyundan razı qalsam da, nəticə məni qane etmədi
Bakı, 14 sentyabr, AZƏRTAC
Yekunda nümayiş etdirilən oyundan razı qalsam da, nəticə məni qane etmədi. Bununla belə, komanda üçün faydalı matç oldu. Göstərdikləri mübarizəyə görə basketbolçularıma təşəkkür edirəm. İndi bütün diqqətimizi FIBA Avropa Kubokuna hazırlıq prosesinə yönəldəcəyik.
AZƏRTAC xəbər verir ki, bu sözləri basketbol üzrə FIBA Çempionlar Liqasının təsnifat mərhələsində Latviyanın "VEF Riqa" klubuna 88:105 hesabı ilə məğlub olan "LANDAU Lions" komandasının baş məşqçisi Erhan Toker deyib.
Görüşü dəyərləndirən türkiyəli mütəxəssis ilk iki dövrəni daha yaxşı keçirdiklərini bildirib: "İkinci yarıda bir qədər oyundan kənarlaşdıq. Təbii ki, bu, hələ tam hazır olmamağımızla bağlı ola bilər. Çünki bu, bizim birgə keçirdiyimiz cəmi ikinci oyun idi. Hələ də komandada oyunçuların rolları tam müəyyənləşməyib. Görüşdə razı qaldığım və narazı olduğum məqamlar var idi. Müdafiədə daha sərt mübarizə aparmalı idik".
Qeyd edək ki, Çempionlar Liqasında mübarizəni dayandıran "LANDAU Lions" yoluna Avropa Kubokunun G qrupunda davam edəcək.
Bölmənin digər xəbərləri
