Ukraynalı gənclər COP29-dan danışıblar
Kiyev, 11 noyabr, AZƏRTAC
Ukraynalı gənclər beynəlxalq prosesləri və forumları izləyir, onların qlobal çağırışların və təhdidlərin həllinə necə təsir etməsi ilə bağlı fikir yürüdürlər. Ukrayna gəncləri arasında böyük gözləntilər, həmçinin BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP29) Bakıda keçirilməsi ilə də bağlıdır.
İctimai xadim Marına Qonçarukun AZƏRTAC-a verdiyi məlumata görə, konfransdan əsas gözləntiləri arasında müharibənin ekoloji nəticələri də daxil olmaqla məsələnin aktuallaşdırılması və Ukrayna nümayəndə heyətinin işğal olunmuş ərazilərin daxil olduğu regionda ekoloji vəziyyətin bərpasına beynəlxalq ictimaiyyətin köməyini müzakirə etməsi yer alır.
“Müharibə təkcə şəhərləri və infrastrukturu deyil, həm də ekosistemləri məhv edir. Azərbaycan kimi, Ukrayna da ekosiddən əziyyət çəkir. Ümid edirəm ki, COP29-da hərbi təcavüzün nəticələrindən biri olan ətraf mühitə dəymiş ziyanın miqyasının monitorinqi və qeydə alınması üçün konkret mexanizmlər müzakirə olunacaq və zədələnmiş ekosistemlərin bərpasına beynəlxalq yardımın cəlb edilməsi tədbirləri də nəzərdən keçiriləcək”, -deyə Qonçaruk qeyd edib.
O vurğulayıb ki, COP29 həm də ayrı-ayrı ölkələrin üzləşdiyi problemlərin bütün dünya birliyinin hiss etdiyi və ya hiss edəcəyi nəticələrə malik olduğunu beynəlxalq ictimaiyyətə xatırlatmaq üçün vacib platforma olacaq, buna görə də məqbul norma və qaydalara riayət etmək üçün qüvvələrin birləşdirilməsi vacibdir.
Dnepr şəhər Gənclər Şurasının üzvü Polina Pyatnitsa, öz növbəsində, Ukraynanın bu il COP29-da təmsil olunmasının müharibə dövründə hansı ekoloji problemlərin xüsusilə kəskinləşdiyinə və gənclərin, könüllülərin və Ukrayna hakimiyyət orqanlarının diqqətini onlara cəlb etmək üçün dəyərli fürsət olduğunu söylədi. O, bu problemlərin nəticələrini minimuma endirmək üçün birliyə çağırıb: “Konfransdan əsas gözləntilərim arasında yaşıl transformasiyanın maliyyələşdirilməsi və beynəlxalq fondlara çıxış var. Bakıda keçirilən konfrans yaşıl bərpaya nail olmaq üçün genişmiqyaslı təşəbbüslərin həyata keçirilməsi üçün lazım olan iqlimin maliyyələşdirilməsinin yeni məqsədini irəli sürmək üzrə yaxşı fürsət olacaq. Müharibədən əziyyət çəkən digər ölkələr kimi, Ukrayna üçün də aşağı karbonlu iqtisadiyyata keçid və yaşıl infrastrukturun yenidən qurulmasına dəstək vermək çox vacibdir. Məqsədimiz 2050-ci ilə qədər iqlim neytrallığına nail olmaqdır və bunun üçün qlobal fondlara çıxış lazımdır”.
Polinanın COP29-dan gözləntilərindən biri də gənclərin rolunu gücləndirmək və ekoloji innovasiyalar üçün əməkdaşlığı inkişaf etdirməkdir. “Ukrayna və Azərbaycan gəncləri artıq ətraf mühitin qorunması üçün çox işlər görürlər. Mən COP29-un gənc fəallar və sahibkarlar üçün layihələrinin diqqətə çatdırılması və dəstəklənməsi baxımından bir fürsət olacağını gözləyirəm. Əminəm ki, COP29-da Ukrayna pavilyonu möhkəmliyin və yaşıl bərpanın mühüm simvoluna çevriləcək. Mən Ukraynanın etibarlı dostu olan Azərbaycanın ölkəmizin ideya və təşəbbüslərini dəstəkləyəcəyinə ürəkdən inanıram”.
Gənc fəal Darya Ponomarenko da hesab edir ki, COP29 iqlim problemlərinin həllinə inteqrasiya olunmuş yanaşmaya töhfə verəcək geniş iştirakçıları, yəni gəncləri cəlb etmək üçün əla fürsətdir.
“Dövrümüzün müəyyənedici problemi iqlim dəyişikliyidir, ona görə də COP kimi beynəlxalq platformaların mövcudluğu beynəlxalq dialoqun gücləndirilməsi, dövlətlərin öhdəliklərinə yenidən baxılması və iqlimlə bağlı fəaliyyətin maliyyələşdirilməsi mexanizmlərinin müzakirəsi üçün vacibdir. Fikrimcə, iqlim dəyişikliyi təhlükəsinin ciddiliyini, davamlı inkişafın təmin edilməsinin vacibliyini ən yaxşı anlayan və ekoloji təşəbbüslərin həyata keçirilməsində lider ola biləcək zümrə məhz gənclərdir. Mən bir ukraynalı kimi bu fürsətdən istifadə edərək, Ukraynanın COP29-da layiqli iştirakını dəstəkləmək istəyinə görə Azərbaycan Respublikasına təşəkkür etmək istərdim. Bu cür dəstək bizim üçün böyük əhəmiyyət kəsb edir, çünki biz dünyaya müharibənin yaratdığı ekoloji problemlər barədə məlumat verməliyik, həmçinin bu problemlərin həlli üçün beynəlxalq əməkdaşlığın zəruriliyini vurğulamalıyıq. Birgə səylərlə biz qlobal ekoloji təhlükəsizliyin təmin edilməsində mühüm irəliləyişə nail ola və ölkələrimiz üçün davamlı inkişafı təmin edə bilərik”, - deyə Darya Ponomarenko bildirib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
